घिरिङ अध्यक्ष कपको उपाधी वडा नं. १ र २ ले जित्यो

तनहुँको घिरिङ गाउँपालिकाको युवा खेलकुद विकास समितिले आयोजना गरेको घिरिङ अध्यक्ष कप भलिबल प्रतियोगिता बुधबार सम्पन्न भएको छ । प्रतियोगिताको उपाधी पुरुषतर्फ वडा नं. १ र महिलातर्फको उपाधी वडा नं. २ ले जितेको छ । बुधबार भएको फाइनल खेलमा पुरुषतर्फ वडा नं. २ लाई पराजित गर्दै वडा नं. १ ले उपाधि जित्न सफल भएको हो ।

यस्तै महिलातर्फ भएको खेलामा वडा नं. १ लाई पराजित गर्दै वडा नं. २ प्रथम हुने सफल भएको हो । प्रतियोगितामा प्रथमलाई ४० हजार रुपैयाँ र द्धितीय हुनेलाई ३० हजार रुपैयाँ नगद पुरस्कार प्रदान गरिएको छ । प्रतियोगितामा पुरुषतर्फ पाँच र महिलातर्फ पाँच टिमको सहभागिता रहेको थियो ।

विजयी प्रतियोगितलाई तनहुँ क्षेत्र नं. २ का प्रतिनिधि सभा सदस्य केदार सिग्देलले पुरस्कृत गरेका थिए । उनले सो अवसरमा वर्तमान सरकाले विकास निर्माणका कामलाई प्राथमिकता दिएको बताए । सांसद सिग्देलले सुखी नेपाली समृद्ध नेपाल निर्माण गर्न भौतिक विकाससंगै शिक्षा, स्वास्थ्य, खेलकुद र अन्य विकासको कामलाई प्राथमिकतामा राखेर काम अगाडि बढाइएको बताए ।

प्रत्येक स्थानीय तहको केन्द्रसम्म कालोपत्रे सडक, सबै घरधुरीमा खानेपानी, विद्युतीकरणको सेवा सरकारको प्राथमिकतामा परेको बताउँदै सांसद सिग्देलले गाउँगाउँमा सुविधाजनक अस्पतालको निर्माण शुरु भएको चर्चा गरे । तीनवटै तहका सरकारले समन्वय गरेर काम गर्नुपर्ने बताउँदै उनले जनताको विश्वास जितेर काम गरे अपेक्षा पूरा गर्न सकिने समेत बताएका छन् ।

अहिले संविधान सर्वस्वीकार्य भएको बताउँदै सांसद सिग्देलले सबै समूह राजनीतिक मुलधारमा आएको बताउँदै अब राजनीतिक क्रान्ति गर्नुपर्ने अवस्था नभएको समेत बताए । घिरिङ गाउँपालिका हुँदै स्याङजाको गल्याङदेखि चितवनको गाइघाट जोड्ने सहायक राजमार्ग निर्माण हुन लागेको बताउँदै उनले यसैवर्ष खर्च गर्न ४ करोड र ४० करोड रुपैयाँ थप विनियोजन हुने बताए ।

घिरिङ गाउँपालिकाका अध्यक्ष रानबहादुर रानाले आफु निर्वाचित भएर आउँदा गाउँपालिकाभरि १० प्रतिशत घरमा मात्रै विजुली बलेपनि अहिले सबै घरधुरीमा बिजुली पुगेको बताए । खानेपानी र सिंचाईमा पनि धेरै प्रगती भएको बताउँदै अध्यक्ष रानाले कृष्णमार्गमा शीघ्र कालोपत्रे गर्न निर्माण गम्पनीको ध्यानाकर्षण गराउँदै आएको बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर