ऋषिङको ग्वास्लुङ स्वास्थ्य इकाईद्वारा मासिक खोप र स्वास्थ्य शिक्षा कार्यक्रम संचालन

ऋषिङ : तनहुँको ऋषिङ गाउँपालिका–३ स्थित ग्वास्लुङ्ग सामुदायिक स्वास्थ्य इकाईले आइतबार नियमित मासिक खोप र स्वास्थ्य शिक्षा कार्यक्रम सञ्चालन गरेको छ । इकाईले यस अवसरमा, स्वास्थ्य आमा समूहको बैठक गरी समुदायको स्वास्थ्य सम्बन्धी विभिन्न विषयमा छलफल समेत गरेको छ ।

समुदायमा स्वास्थ्य शिक्षा र सरसफाइका महत्वपूर्ण पहलुहरूमा जनचेतना फैलाउनु मुख्य उद्देश्यका साथ स्वास्थ्य इकाईले बच्चाहरूसँगै महिलाहरूका लागि स्वास्थ्य सेवामा पहुँच र सुधारका लागि लगातार काम गर्दै आएको स्वास्थ्य इकाई प्रमुख तिलक रानाभाटले जानकारी गराए ।

इकाईल जुका (परजिवि) को रोकथाम र उपचारका विषयमा समेत जानकारी गराएको छ । स्वास्थ्य आमा समूहका सदस्यहरूलाई कार्यक्रममा जुका (जुकाको संक्रमण) र यसको रोकथामका उपायहरूमा विशेष ध्यान केन्द्रित गराइएको थियो । जुका विशेष गरी ५ वर्ष मुनिका बालबालिका र गर्भवती महिलाहरूमा बढी असर गर्ने गरेको पाइन्छ । यसका लक्षणहरू र उपचारका उपायहरूका बारेमा विस्तृत जानकारी दिइएको छ ।

समुदायमा सरसफाइको कमी र स्वास्थ्य शिक्षाको अभावले गर्दा जुका तथा अन्य संक्रमण फैलिने जोखिम उच्च रहेको बताइएको छ । कार्यक्रममा सहभागीहरूले जुका रोगको रोकथामको लागि स्थानीय समुदायमा अझ बढी सचेतना र स्वास्थ्य सेवा प्रवाहलाई प्राथमिकतामा राख्न सुझाव दिइएको स्वास्थ्य इकाईका प्रमुख रानाभाटले बताए ।

उक्त कार्यक्रमको अवसरमा दुई वर्ष मुनिका बालबालिकाहरूको तौल मापन र मध्य पाखुराको नाप गरेर पोषण स्थितिको जाँच पनि गरिएको थियो । यसले बालबालिकाको स्वास्थ्य र पोषण अवस्थालाई सुधार्नका लागि आवश्यक उपायहरूको पहिचान गर्न मद्दत पु¥याउने बताइन्छ ।

ग्वास्लुङ्ग सामुदायिक स्वास्थ्य इकाईका प्रमुख अधिकारीले यस प्रकारका कार्यक्रमहरूले समुदायमा स्वास्थ्य सुधार ल्याउने आशा व्यक्त गर्दै, सबैलाई नियमित स्वास्थ्य सेवामा सहभागी हुन स्थानीयलाई आग्रह समेत गरेका छन् ।

कार्यक्रममा स्वास्थ्य इकाईले स्वास्थ्यका सबै पक्षमा समुदायको सहभागिता र सहयोग आवश्यक रहेको बताएका छन् । यसरी मासिक खोप र स्वास्थ्य शिक्षा कार्यक्रमले समुदायको स्वास्थ्य स्थितिमा सुधार ल्याउन र रोगहरूको रोकथाम गर्न महत्त्वपूर्ण योगदान पु¥याउने विश्वास व्यक्त गरिएको छ ।