तनहुँमा भोली राती १२ बजेबाट निषेधाज्ञा, के गर्न पाइन्छ, के गर्न पाइदैन ? (सूची सहित)
भञ्ज्याङ न्यूज
जिल्ला संकट व्यवस्थापन केन्द्र तनहुँले वैशाख २२ गते बुधबार राती १२ बजेदेखि लागु हुने गरी जिल्लामा निषेधाज्ञा जारी गर्ने निर्णय गरेको छ । तनहुँका केही पालिकामा कोभिड-१९ को संक्रमण बढ्दै गएपछि मंगलबार बसेको केन्द्रको बैठकले बुधबार राती १२ बजेबाट लागु हुने गरी बैशाख ३१ गतेसम्म निषेधाज्ञा आदेश जारी गर्ने निर्णय गरेको हो ।
केन्द्रका अध्यक्ष एवं प्रमुख जिल्ला अधिकारी सागर आचार्यको अध्यक्षतामा बसेको बैठकले अत्य आवश्यक बाहेक अन्य सम्पूर्ण क्षेत्र बन्द गर्ने गरी निषेधाज्ञा जारी गर्ने निर्णय गरेको छ । जिल्ला समन्वय समिति तनहुँको संयोजनमा सोमबार दमौलीमा बसेको पालिका प्रमुखहरुको बैठकले तीन दिनभित्र निषेधाज्ञा गर्न संकट व्यवस्थापन केन्द्रलाई अनुरोध गरेको थियो ।
सोही अनुरोध र नयाँ भेरियन्ट सहितको कोरोना संक्रमणको जोखिम उच्च बन्दै गएपछि निषेधाज्ञा गर्ने निर्णय भएको सहायक प्रमुख जिल्ला अधिकारी चित्राङ्गत बरालले जानकारी गराएका छन् । बैकठले ऋषिङ गाउँपालिकाको वडा नं. २, ३, ४, ५, ६ ७ र ८ तथा घिरिङ गाउँपालिका बाहेक जिल्लाका अन्य पालिकाहरुमा अति आवश्यक कार्य र सेवा बाहेकका कार्य र सेवा गर्न नपाउने गरी निषेधाज्ञा जारी गरिएको सहायक प्रजिअ बरालले बताएका छन् ।
उक्त बैठकमा भारत र अन्य मुलुकबाट आउने व्यक्तिहरुको निगरानी राख्न वडास्तर र टोलस्तरमा यस अघि गठन भएका समितिलाई पुनः सक्रिय बनाउने, उनिहरुलाई निगरानीमा राख्ने, दश दिन अनिवार्य रुपमा क्वारेन्टिनमा राख्ने व्यवस्था मिलाउन स्थानीय तहलाई आग्रह गर्ने निर्णय गरिएको छ ।
यस्तै, स्थानीय तहका स्वास्थ्य शाखा प्रमुख संयोजक रहेको होम क्वारेन्टिन र होम आइसोलेशन तोक्ने एवं अनुगमन गर्ने समितिलाई पुनः सक्रिया बनाई समय समयमा अनुगमन गरी व्यवस्थित र अनुशासित बनाउने तथा अनुगमनमा स्थानीय शिक्षक कर्मचारीलाई समेत परिचालन गराउने निर्णय बैठकले गरेको छ ।
बैठकले पिसिआर परीक्षणको दायरा बढाउन, शव व्यवस्थापनका लागि सबै व्यवस्थापकीय तयारीमा राख्न स्थानीय तहलाई अनुरोध गरेको छ । तनहुँमा दैनिक कोरोना संक्रमितको संख्या बढ्दै गएको छ । मंगलबार मात्र तनहुँका १६ जनामा संक्रमण पुष्टि भएको छ ।
