पत्रकार महासंघ तनहुँको पत्रकार कल्याणकारी कोषमा २० हजार सहयोग
भञ्ज्याङ न्यूज
नेपाल पत्रकार महासंघ तनहुँ शाखाले स्थापना गरेको कल्याणकारी कोषमा भानु नगरपालिका-९ पुर्कोटका राम पाण्डले आर्थिक सहयोग गरेका हुन् । प्रभु बैंकका पूर्व सञ्चालक, प्रभु लाइफ इन्स्योरेन्सका पूर्व अध्यक्ष, आशा लधुवित्त वित्तीय संस्थाका पूर्व अध्यक्ष समेत रहेका पाण्डेले कोषका लागि आइतबार बीस हजार रुपैयाँ सहयोग गरेका हुन् ।
संचार क्षेत्र र संचारकर्मिहरुको हितमा खर्च हुने कल्याणकारी कोषमा सहयोग गर्न पाँउदा खुशी लागेको पाण्डेले बताए । पाण्डेले सो रकम नेपाल पत्रकार महासंघ तनहुँ शाखको नाममा नेपाल बैंक लिमिटेड दमौली शाखामा रहेको खाता नं. ०६०००१००३३५३३१०००००१ मा जम्मा गरेको महासंघ तनहुँका सह-सचिव प्रकाश अधिकारीले बताए ।
नेपाल पत्रकार महासंघ तनहुँको यही जेठ १ गते बसेको बैठकले पत्रकार कल्याणकारी कोष स्थापना गर्ने निर्णय गरेको थियो । कल्याणकारी कोष स्थापनाका लागि पत्रकारहरू, शुभेक्षछुक, सहयोगी संस्था र व्यक्तिहरुबाट कल्याणकारी कोषका लागि आर्थिक संकलन गर्ने निर्णय गरेको महासंघ तनहुँका अध्यक्ष उज्वल पौडेलले बताए ।
