पत्रकार कल्याणकारी कोषमा लोक गायक महतद्वारा आर्थिक सहयोग
भञ्ज्याङ न्यूज
तनहुँको शुक्लागण्डकी-८ ढोरफिर्दी घर भई हाल अमेरिकाको वाल्टीमोरमा बस्दै आएका अमेरीकाका लागि अवैतनिक महावाणिज्यदुत प्रेमराजा महतले नेपाल पत्रकार महासंघ तनहुँ शाखाको पत्रकार कल्याणकारी कोषमा रकम सहयोग गरेका छन् । महतले कोषका लागि २५ हजार ५५५ रुपैयाँ सहयोग गरेका छन् । नेपाल पत्रकार महासंघका केन्द्रीय सदस्य प्रदीप काफ्लेको पहलमा महतले सहयोग रकम हस्तान्तरण गरेका हुन् ।
महतले जिल्लामा रहेका संचारकर्मीहरुले गरेको पुण्य काममा आफ्नो सदैव सहयोग रहने बताएका छन् । उनले विगतमा पनि सहयोग गरेको र जिल्लाको संचार क्षेत्रको विकासमा आगामी दिनमा समेत सहयोग गर्ने प्रतिवद्वता जनाएका छन् ।
२०३४ सालदेखि लोक गायन क्षेत्रमा सक्रिय महत अहिले अमेरीकाको बाल्टीमोरमा ‘नेपाली हाउस’ होटल संचालन गर्दै आएका छन् । महतले नेपालका बिभिन्न समाजिक संघ संस्थाका अलवा अमेरीकामा समेत नेपाली समाज तथा मठ मन्दिरमा सहयोग गर्दै आएका छन् ।
