तनहुँमा निषेधाज्ञा खुकुलो : राजमार्गमा सार्वजानिक सवारी चल्ने (के के गर्न पाइने/नपाईने आदेश सहित)
भञ्ज्याङ न्यूज
कोरोना भाइरस संक्रमण रोकथाम तथा न्यूनिकरणका लागि भन्दै गत वैशाख २३ गतेबाट जारी गरिएको निषेधाज्ञालाई केही खुकुलो बनाउँदै असार ३१ गतेसम्मका लागि लम्ब्याइएको छ ।
प्रमुख जिल्ला अधिकारी सागर आचार्यको अध्यक्षतामा बुधबार विहान बसेको जिल्ला कोभिड संकट व्यवस्थापन केन्द्रको बैठकले कोभिड-१९ को जोखिम अझै कम नभएको र समुदाय स्तरमा व्यापक फैलन सक्ने अवस्थालाई ध्यानमा राख्दै निषेधाज्ञाको आदेशलाई निरन्तरता दिन सिफारिस गरेको थियो ।
कोभिड-१९ को जोखिमबाट सुरक्षित रहन भन्दै पटक पटक थप गर्दै असार २४ गतेसम्मको लागि लम्ब्याईएको निषेधाज्ञालाई केही खुकुलो बनाउँदै असार ३१ गते राती १२:०० बजेसम्म कायम रहने गरी जिल्ला प्रशासन कार्यालय निषेधाज्ञा लम्ब्याएको हो ।
निषेधाज्ञा थप भएपनि यस अघिको भन्दा केही खुकुलो बनाईएको छ । प्रमुख जिल्ला अधिकारी सागर आचार्यले निषेधाज्ञाको आदेश जारी गर्दै अब पृथ्वीराजमार्गमा जोर बिजोर नम्बर अनुसार सार्वजानिक सवारी साधन सञ्चालन गर्न पाईने बताएका छन् ।
प्रशासनद्वारा जारी आदेशमा विहान ६ देखि साँझ ६ बजेसम्म पृथ्वीराजमार्गको कोत्रेदेखि मुग्लिङ सडक खण्डमा सिट संख्या भन्दा धेरै यात्रु राख्न नपाईने गरी जोर बिजोर अनुसार सवारी सन्चालन गर्न पाईने व्यवस्था गरिएको छ ।
पछिल्ला केही दिन यातयात व्यवसायीहरुले सार्वजानिक यातयात सञ्चालन गर्न पाउनु पर्ने माग गर्दै आएका थिए । डिसिसिएमसीको बैठकले राजमार्गमा भएपनि सार्वजानिक सवारी साधन सञ्चालन गर्न पाउने निर्णय गरेर व्यवसायीलाई थोरै भएपनि राहत पुग्ने व्यवसायीहरुले बताएका छन् । सार्वजानिक सवारी सञ्चालन गर्दा चालक दल र सबै यात्रुले अनिवार्य मास्क र सेनिटाइजर प्रयोग गर्नुपर्ने र स्वास्थ्य सुरक्षा मापदण्ड पालना नगरेमा कारवाही गरिने प्रशासनले जनाएको छ ।
यस्तै होटल तथा रेष्टुरेन्टलाई तयारी खाना तथा खाजा प्याकिङ गरी बिक्री गर्न मात्र सुविधा दिईएको छ । बैंक तथा वित्तीय संस्थाहरु न्युनतम् कर्मचारीको उपस्थिती गर्राई स्वास्थ्य सुरक्षा मापदण्डको पूर्ण पालना गरेर सञ्चालन गर्न पाईने भएको छ ।
फलफुल, खाद्यान्न, तरकारी, दुध र दुग्धजन्य पदार्थ, माछा, मासु, अण्डा, दाना पशुपन्छीको औषधी बिक्री गर्ने पसल विहान ५ देखि ११ बजेसम्म सञ्चालन गर्न पाईने भएको छ भने अत्यावश्यक बाहेका अन्य सबै प्रकारका व्यवसाय विहान ९ देखि ३ बजेसम्म सञ्चालन गर्न अनुमति दिइएको छ ।
नीजि सवारी साधनहरु यस अघि नै जोर/बिजोर रुपमा सञ्चालन गर्न दिइएको थियो । सिनेमा हल, पार्टी प्यालेस, डान्सबार, दोहोरी घर, हेल्थ क्लव, व्युटी पार्लर, सैलुन, सभा, आमसभा, जुलुस, हाटबजार, रंगशालामा हुने दर्शक सहितको खेलकुद तथा भौतिक रुपमा हुने तालिम, प्रशिक्षण र सेमिनार पनि निषेधाज्ञाको समयमा सन्चालन गर्न नपाईने भएको छ ।
यसैगरि स्वास्थ्य सुरक्षाको मापदण्ड पालना नगरी आउने ग्राहकलाई व्यापार नगर्न र व्यवसायीले समेत स्वास्थ्य सुरक्षाको मापदण्ड पालना गर्नुपर्ने व्यवस्था गरिएको छ । मास्क नलगाई आउने व्यवसायीलाई सेवा वा बस्तुको विक्री गरेमा त्यस्तो व्यवसायीलाई कारवाही गरिने सहायक प्रमुख जिल्ला अधिकारी चित्राङ्गत बरालले बताए ।
निषेधाज्ञा आदेशको उल्लंघन गरेमा कोभिड-१९ संकट व्यवस्थापन सम्बन्धमा व्यवस्था गर्न बनेको अध्यादेश २०७८ को दफा ४ तथा स्थानीय प्रशासन ऐन २०२८ को दफा ६ बमोजिम कारवाही गरिने सहायक प्रमुख जिल्ला अधिकारी बरालले बताए ।
