तनहुँमा कोरोनाका २७५ सक्रिय संक्रमित, संक्रमित होम आइसोलेशनमै बस्दा संस्थागत आइसोलेशन खाली

तनहुँको पछिल्लो हप्ता कोरोना भाइरस संक्रमितको संख्यामा उतारचढाव आएको छ । स्वास्थ्य निर्देशनालय गण्डकी प्रदेशले सार्वजनिक गरेको विवरणमा आइतबार १५, सोमबार २४ र मंगलबार २० जनामा कोरोना संक्रमण पुष्टि भएको छ। जिल्लामा पछिल्लो समय संक्रमितको संख्या घट्दै गएको देखिएपनि जोखिम भने कायमै रहेको स्वास्थ्य विज्ञहरुले बताउँदै आएका छन् ।

कोरोना संक्रमितको संख्या केही घट्दै गएको र संक्रमितहरुमा पनि गम्भिर स्वास्थ्य समस्या नदेखिएकाले संक्रमितको व्यवस्थापन तथा उपचार सहज बनाउनका लागि जिल्लामा तयार गरिएका संस्थागत आइसोलेशन कक्ष पनि खाली हुँदै गएका छन् । संक्रमितहरुको स्वास्थ्यमा जटिल समस्य नदेखिनुका साथै अधिकांश संक्रमितहरु होम आइसोलेशनमै बस्ने गरेका कारण जिल्लाका संस्थागत आइसेलेशनहरु खाली गएको स्वास्थ्य कार्यालय तनहुँले जनाएको छ ।

स्थानीय प्रशासनले निषेधाज्ञा खुकुलो बनाएसंगै जनजीवन लयमा फर्कदै गएकोछ । अहिले सार्वजनिक यातायातका साधनहरु पनि सञ्चालनमा आएका छन भने अन्य पेशा व्यवसायहरु पनि समयावधि तोकेर खुल्ला गरिएको छ । निषेधाज्ञा खुकुलो बनेसंगै सर्वसाधारणको चहलपहल शहरबजार क्षेत्रमा बक्लिदै गएको छ । असार पहिलो साताबाट क्रमिक रुपमा निषेधाज्ञा खुकुलो गरिदै लगेसंगै सर्वसाधारणको चहलपहल बढ्दा कोरोना संक्रमण पुन फैलने हो कि भन्ने जोखिम बढेको स्वास्थ्य कार्यालय तनहुँका प्रमुख शंकरबाबु अधिकारीले बताए । उनले भने, ‘नागरिकस्तरबाट भएको लापरवाहीका कारण जिल्लामा संक्रमितको संख्या दैनिक थपिदै गएको छ । संक्रमितको संख्या बढेपनि लक्षण नदेखिएको भन्दै होम आइसोलेशनमै बस्दा स्थानीय तहद्वारा संचालन गरिएको आइसोलेशन कक्ष पनि खाली हुन थालेका छन् ।’

अधिकांश संक्रमितहरु होम आइसोलेशनमै बस्ने र लामो समयदेखि भानु नगरपालिकाको १७ वेड क्षमताको आइसोलेशन खाली हुँदा यहि असार १ गतेबाट कोरोना अस्पताल बन्द गरिएको नगरपालिकाका स्वास्थ्य शाखा प्रमुख ऐश्वर्यचन्द्र भट्टराइले बताए । उनले भने, ‘लक्षण देखिएका संक्रमितलाई दमौली अस्पतालको कोभिड उपचार केन्द्र र जिपी कोइराला राष्ट्रिय श्वासप्रश्वास उपचार केन्द्र, बेलचौतारा पठाउने गरिएको छ, लक्षण नदेखिएका होम आइसोलेशनमै बस्ने गरेका कारण नगरपालिकाले पुनरडिही स्वास्थ्य चौकीमा तयार गरेको कोरोना अस्पताल बन्द गरिएको छ ।’

भानुले मात्र होइन व्यास नगरपालिकाले पनि पुरानो कृषि बिकास बैंकको भवनमा सञ्चालन गरेको ५० बेड क्षमताको सामुदायिक आइसोलेशन कक्ष बन्द गरेको छ । उक्त आइसोलेशनमा ८५ जना संक्रमितले उपचार सेवा लिएका नगरपालिकाका स्वास्थ्य शाखा प्रमख प्रमोद सोतीले बताए । उनले भने, ‘संक्रमितहरु आउन छाडेपछि गत असार १९ गते नै आइसोलेशन कक्ष बन्द गरिएको हो । नगरपालिकाले एमविविएस चिकित्सक र अन्य स्वास्थ्यकर्मी सहितको टोली खटाएको थियो ।’

जिल्लाका अन्य पालिकाका आइसोलेशन कक्षहरु तयारी अवस्थामा रहेतापनि संक्रमित भने उपचारत छैनन् । भिमाद, शुक्लागण्डकी नगरपालिका, आँबुखैरेनी, देवघाट, घिरिङ र रिसिङ्ग गाउँपालिकाका जम्मा १०८ वेडको आइसोलेशन कक्ष तयारी अवस्थामा रहेतापनि खाली रहेको सम्बन्धित पालिकाका स्वास्थ्य प्रमुखहरुले बताएका छन् ।

यस्तै, बन्दीपुर गाउँपालिकाको १५ वेड क्षमताको आइसोलेशन कक्षमा १ जना, दमौली अपतालको ३१ वेड क्षमताको कोरोना उपचार केन्द्रमा २३ जना र जिपी कोइराला राष्ट्रिय श्वासप्रश्वास उपचार केन्द्रको ३० वेड क्षमताको कोभिड अस्पतालमा ८ जना उपचारत रहेको जनाइएको छ । दमौली अस्पतालमा २० जना जनरल वेड र ३ जना आइसीयूमा उपचारत रहेको अस्पतालका मेडिकल सुपरिटेन्डेन्ट सुनिल पौड्यलले बताए ।

‘सामान्य लक्षण देखिएका संक्रमितहरु घरमै बस्न खोज्छन्’, उनले भने, ‘स्वास्थ्य सुरक्षाका मापदण्ड नअप्नाइदिदा अन्यमा संक्रमण हुने खतरा तथा संक्रमित नै गम्भिर स्थितिमा पुग्छन् । अन्तिम अवस्थामा अस्पताल आइपुग्दा स्थिति समाल्न स्वास्थ्यकर्मीहरुलाई कठिन हुने गरेको छ ।’ यता नगरिकहरुको लापरवाहीका कारण दैनिक संक्रमितको संख्या थपिदै गएको स्वास्थ्य कार्यालय तनहुँद्वारा जारी तत्थ्यांकमा देखाउने गरिएको छ । कार्यालयका प्रमुख अधिकारीले भने, ‘निषेधाज्ञा केही खुकुलो गरिएको छ । मानिसहरु अनावश्यक रुपमा स्वास्थ्य सुरक्षाका मापदण्ड नअप्नाई घरबाहिरा निस्किदा संक्रमणको जोखिममा बढेको छ ।’

जबसम्म सर्वसाधारण स्वास्थ्य सुरक्षाका सामाग्री प्रयोग तथा मापदण्ड पालनामा सचेत बन्दैनन तबसम्म कोरोना संक्रमण जोखिम रहिरहने स्वास्थ्य विज्ञहरु बताउँछन् । हालसम्म जिल्लामा ५ हजार ४०२ जनाको पीसीआर र ४ हजार १८ जनाको एन्टिजिन प्रविधिबाट कोरोना परीक्षण गर्दा ३ हजार ७५३ जनामा संक्रमण पुष्टि भएको छ । संक्रमित मध्ये ३ हजार ३८६ जना निको भएका छन् भने २७५ जना सक्रिय संक्रमित रहेको स्वास्थ्य कार्यालयको तथ्याङ्कमा देखाइएको छ । दोश्रो लहरको कोरोना संक्रमणबाट तनहुँका ९२ जनाको मृत्यु भएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर