बन्दिपुरका दुध उत्पादक कृषकलाई अनुदान
भञ्ज्याङ समाचारदाता/बन्दिपुर
तनहुँको बन्दिपुर गाउँपालिकाले कृषकलाई व्यवसायिक बनाउन उत्पादनमा आधारित अनुदान कार्यक्रम अगाडि बढाएको छ । यही कार्यक्रम अन्तरगत गाउँपालिकाले दुग्ध उत्पादक सहकारी संस्थामा आबद्ध रही दूध बिक्री गर्दै आएका कृषकलाई प्रतिलिटर एक रुपैयाँका दरले अनुदान उपलब्ध गरेको छ । दुग्धजन्य पदार्थमा आत्मनिर्भर गराउने उद्देश्यले गाउँपालिकाले किसानलाई प्रतिलिटर दूधमा एक रुपैयाँ अनुदान दिने व्यवस्था गरेको हो ।
गाउँपालिकाले वडा नं. १ स्थित सूर्योदय दुग्ध उत्पादक सहकारी संस्थामा आबद्ध किसानलाई उत्पादनमा आधारित कार्यक्रम अनुरुप अनुदान रकम प्रदान गरेको छ । गाउँपालिकाका अध्यक्ष पूर्णसिं थापा, वडाध्यक्ष भानुभक्त पोख्रेल, दुग्ध उत्पादक सहकारी संस्थाका अध्यक्ष मानबहादुर खातीको रोहवरमा किसानलाई अनुदान रकम वितरण गरिएको हो । उक्त सहकारीमा आबद्ध ६१ जना किसानलाई प्रतिलिटर एक रुपैयाँका दरले अनुदान दिँदा कूल एक लाख ६२ हजार रुपैयाँ वितरण गरिएको वडाध्यक्ष पोख्रेलले बताए ।
उक्त सहकारीले दैनिक करिब ७०० लिटर दूध उत्पादन गरी बिक्री गर्दै आएको छ । जति उत्पादन गर्यो, त्यति फाइदा हुने भएपछि किसान उत्साहित भएर उत्पादन वृद्धिमा लाग्ने गरेको वडाध्यक्ष पोख्रेलले बताए ।
गाउँपालिकाको वडा नं ५ स्थित याम्पाफाँट दुग्ध उत्पादक सहकारी संस्थाले दैनिक चार हजार लिटर दूध उत्पादन गर्दै आएको छ । उक्त सहकारीमा आबद्ध किसानलाई एक रुपैयाँका दरले १०० किसानलाई अनुदान दिँदा नौ लाख ५२ हजार रुपैयाँ वितरण हुने गाउँपालिकाका पशु शाखाका प्रमुख मधुविलास न्यौपानेले बताए ।
‘उक्त सहकारीलाई छिट्टै रकम वितरण गर्ने योजना बनाएका छौँ”, उनले भने ‘दूधमा पाँच हजाररुपैयाँदेखि बढीमा ३६ हजार रुपैयाँसम्म अनुदान पाउने किसान रहेका छन् ।’ गाउँपालिकाले दूध र मासुमा आत्मनिर्भर गराउने उद्देश्यले किसानलाई विशेष प्राथामिकतामा राखेर अनुदानका कार्यक्रम ल्याइएको गाउँपालिकाका अध्यक्ष पूर्णसिं थापाले बताए । दुग्ध उत्पादक किसानलाई मात्रै कूल ११ लाख १२ हजार रुपैयाँ अनुदान वितरण गरिने बताइएको छ ।
