घिरिङ गाउँपालिकालाई स्वास्थ्य सामग्रि सहयोग
भञ्ज्याङ समाचारदाता/दमौली
तनहुँको घिरिङ गाउँपालिकालाई स्वास्थ्य सामग्री सहयोग गरिएको छ । कारितास नेपाल धोविघाट ललितपुरले कोभिड-१९ संग जुध्न सहयोग पुग्ने गरी गाउँपालिकालाई करिब दुइ लाख १८ हजार रुपैयाँ बराबरको स्वास्थ्य सामग्रि सहयोग गरेको हो । कोभिड-१९ रोकथाम तथा नियन्त्रणमा सहयोग पुर्याउने उद्देश्यले सामग्री हस्तान्तरण गरिएको संस्थाका प्रतिनिधि प्रकाशचन्द्र चाडले जानकारी गराए ।
गाउँपालिकाका अध्यक्ष रनबहादुर रानाले स्वास्थ्य सामग्रीले कोभिड नियन्त्रणका लागि सहयोग पुग्ने जनाउँदै उक्त संस्थाप्रति धन्यवाद व्यक्त गरे । गाउँपालिकालाई मास्क, स्यानीटाइजर, पिपिइ, पञ्जा, फेसशिल्ड, स्यानीटाइजर लगायतका सामग्री सहयोग गरिएको छ ।
यसअघि सोही संस्थाले दमौली अस्पताल र शुक्लागण्डकीस्थित जिपी कोइराला श्वासप्रश्वास उपचार केन्द्रलाई ३० लाख ५२ हजार १५७ रुपैयाँ बराबरको स्वास्थ्य सामग्री सहयोग गरेको थियो । दमौली अस्पताललाई १९ लाख १५ हजार १२३ रुपैयाँ र जिपी कोइराला श्वासप्रश्वास उपचार केन्द्रलाई ११ लाख ३७ हजार ३४ रुपैयाँ बराबरको स्वास्थ्य सामग्री सहयोग गरिएको बताइएको छ । उक्त संस्थाले गण्डकी प्रदेशका सात अस्पताललाई एक करोड २० लाख ९८ हजार ४११ रुपैयाँ बराबरको स्वास्थ्य सामग्री सहयोग गरिसकेको बताइएको छ ।
