एमसिसीका कारण गठबन्धन टुट्न पनि सक्छ : वरिष्ठ नेता पौडेल

नेपाली कांग्रेसका वरिष्ठ नेता रामचन्द्र पौडेलले एमसिसीमा पुष्पकमल दाहाल (प्रचण्ड) र माधवकुमार नेपालले सहयोग नगरे वर्तमान गठबन्धन टुट्न पनि सक्ने बताएका छन् । प्रेस युनियन तनहुँले विहीबार दमौलीमा आयोजना गरेको पत्रकार सम्मेलनमा उनले नेकपा (माओवादी केन्द्र) र नेकपा (एकीकृत समाजवादी)ले एमसिसी पारित गर्न सहयोग नगरे गठबन्धन कायमै राख्नुपर्छ भन्ने पक्षमा कांग्रेस नरहेको प्रष्ट परे ।

उनले सरकारले ल्याएको प्रस्तावको गठबन्धनका दलले सहयोग गर्नुपर्छ, गठबन्धनले साथ नदिए प्रमुख प्रतिपक्षी दलको सहयोगमा भए पनि एमसिसी पास गर्नुपर्छ भन्ने पक्षमा कांग्रेस रहेको बताए । वरिष्ठ नेता पौडेलले एमसिसी असफल बनाएर गठबन्धन कायमै राख्छौँ भन्ने कुरा नगर्न गठबन्धनका नेतालाई आग्रह गर्दै उस्तै परे चुनावमा पनि जान सकिन्छ, चुनाव घोषणा पनि हुन सक्ने बताए ।

एमसिसी अमेरिकी जनताको उपहार भएको बताउँदै नेता पौडेलले एमसिसीको विषयमा अनावश्यक भ्रम फैलाइएको आरोप आरोप लगाए । उनले भने, ‘एमसिसी अमेरिकी साम्राज्यवाद होइन, यो विकास परियोजना हो । जनताका बीचमा भ्रम फैलाउने काम गरिएको छ।’

मादी मर्स्याङ्दी मोटरमार्गको निरीक्षण

यस्तै, नेपाली कांग्रेसका वरिष्ठ नेता पौडेलले मादी मर्स्याङ्दी मोटरमार्गको विहीबार निरीक्षण गरेका छन् । व्यास नगरपालिका-७ बाट सुरु हुने मादी मर्स्याङ्दी मोटरमार्गको निरीक्षण गर्दै यसको अवस्थाका विषयमा जानकारी लिइएका थिए ।

गण्डकी प्रदेशका सांसद सरिता गुरुङ र जिल्ला समन्वय समितिका प्रमुख शान्तिरमण वाग्लेसहितको उपस्थितिमा मोटरमार्गको निरीक्षण गर्दै वरिष्ठ नेता पौडेलले यो मार्ग कालोपत्र भएपछि यस भेगको जनताको जीवनस्तर बदलिने बताए । सो मोटरमार्गका लागि बजेट विनियोजन भई बोलपत्रको प्रक्रिया थालिएको बताइएको छ ।

यस्तै, वरिष्ठ नेता पौडेलले विहीबारै जिल्लाका विभिन्न ठाउँमा आयोजित कार्यक्रममा कार्यकर्ता भेटघाट गरेका छन् । नेता पौडेलले व्यास नगरपालिका-७ कलेस्ती, गजौडे, व्रिता, भानुको टुहुरेपसल र रम्घाटार, महन्ते हटिया, देउरालीटारमा कार्यकर्ता भेटघाट गरेका छन् । सो क्रममा उनले पार्टीलाई सुदृढीकरण गर्नुपर्नेमा जोड दिए ।

वरिष्ठ नेता पौडेल केही दिन गृहजिल्लामा रहने कार्यक्रम रहेको छ । पौडेलले फागुन १३ गते व्यास नगरपालिका-१० मा निर्माण हुन लागेको व्यास नगर अस्पतालको शिलान्यास गर्ने कार्यक्रम रहेको छ ।

सोही दिन पौडेलले कालिका मार्गको अवलोकन गर्नुका साथै रुपाकोटमा आयोजित कार्यकर्ता भेटघाटलाई सम्बोधन गर्ने कार्यक्रम रहेको बताइएको छ । त्यस्तै, फागुन १४ गते नेपाली कांग्रेस तनहुँ क्षेत्र नं २ को आयोजनामा खैरेनीटारमा हुने सुदृढीकरण एवं अन्तक्रिया कार्यक्रममा पौडेलले सम्बोधन गर्ने बताइएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर