बन्दीपुरको बजार अनुगमन : पाउरोटी भण्डारलाई जरिवाना

तनहुँको बन्दीपुर गाउँपालिकाले बजार अनुगमनलाई तिब्रता दिएको छ । गाउँपालिकाका राजश्व शाखा प्रमुख दिनेश पौडेलको संयोजगत्वमा रहेको अनुगमन समितिले मंगलबार डुम्रे बजारका विभिन्न पाउरोटी भण्डार र बेकरी उद्योगहरुको अनुगमन गरेको छ ।

अनुगमनका क्रममा बन्दीपुर-१ को पिप्लेस्थित शिव पाउरोटी उद्योगले सरसफाइमा लापरबाही गरेको, पाउरोटी र केक बनाउँदा अखाद्य वस्तुको मिसावट गर्ने गरेको र उद्योग दर्ता नगरी संचालन गरिएको पाइएकाले २५ हजार रुपैयाँ जरिवाना गरिएको छ । अनुगमन टोलीले उद्योगीलाई आगामी दिनमा कैफियत देखिए शिल गरिने वडा नं. १ का वडा अध्यक्ष शिबकुमार श्रेष्ठले बताए ।

यस अघि गाउँपालिका अन्तर्गत रहेका वडा नं. २ र ४ को बजार क्षेत्रका खाद्यान्न, किराना, फ्रेस हाउस, होस्टलहरुमा अनुगमन गरिएको अनुगमन समितिका संयोजक पौडेलले बताए । र्सवसाधरणको जनगुनासो पछि सरोकारवाला निकायको टोलीसहित अनुगमन गरिएको र दर्ता नविकरण नगर्नेहरुलाई ७ दिनभित्र गाउँपालिकामा उपस्थित हुन भनिएको उनले बताए ।

व्यापारिहरुलाई मनोमानि ढंगले सर्वसाधरणलाई मार हुने गरी बिक्री वितरण नगर्न र बदमासी नगर्न प्रहरीले समेत निर्देशन दिएको छ । पालिकाले उपाध्यक्ष पञ्चमाया गुरुङको संयोजकत्वमा चाडपर्व लक्षित अनुगमन र अन्य समयमा समेत बजार अनुगमन गर्दै आएको प्रमुख प्रशासकीय अधिकृत नवेशराज हमालले बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर