खत्रीखोलाको बाढी भानुको टुहुरेपसल बजारमा पस्यो, खोला किनारका घर जोखिममा
भञ्ज्याङ न्यूज
तनहुँको भानु नगरपालिका-६ टुहुरेपसल बजार क्षेत्रमा ठाडो खोलाको बाढी पसेको छ । मंगलबार राती ११ बजेदेखि परेको झरीका कारण बजारसंगै रहेको खत्री खोलामा आएको बाढी बजार क्षेत्रमा पसी बजार हिलाम्य बनाएको छ ।
टुहुरेपसलको खत्री खोला किनारमा रहेका घर कटानका कारण जोखिममा परेको स्थानीय जलाल खानले बताए । उनका अनुसार खोलासंगै रहेको सम्शेर मियाँको घर जोखिममा परेका कारण घरका बासिन्दालाई सुरक्षित गरी कटान रोक्नका लागि तटबन्ध गर्ने काम भइरहेको छ ।
उक्त खोलामा आएको बाढीले अन्य घरहरुमा पनि सामान्य क्षति पुर्याएको र समयमै तटबन्ध गरी सुरक्षित नगरे खोलामा आएको बाढीले थप क्षति पुर्याउने खतरा बढेको स्थानीय खानले बताए ।
यस्तै, मंगलबार राती परेको वर्षाका कारण चुँदीखोलामा बाढी आउँदा भानु नगरपालिका-२ र ५ जोड्ने बांगेरहको पुलमा पुनः क्षति पुगेको छ । चुँदीखोलामा आएको बाढीले पुलको दुबैतर्फो भागमा क्षेति पुर्याएको छ ।
बाढीले पुलमा क्षति पुर्याएपछि चारपांग्रे सवारीसाधन सञ्चालनमा समस्या आएको छ । स्थानीयको अनुसार बाढीले पुर्याएको क्षति अस्थायी रुपमा मर्मत गरी सवारी साधान वारपार गरिएको भएपनि पुल जेखिमयुक्त अवस्थामा पुगेको छ ।
बाढीबाट पुलमा क्षति पुगेपछि भानु नगरपालिका-५, ६, ७, १०, १२ र १३ तथा व्यास नगरपालिकाको वडा नं. ८ पुलिमराङसम्मका र्सवसाधारणलाई आवतजावतमा समस्या भएको छ । उक्त पुलको पर्खाल मर्मतका लागि नगरप्रमुख आनन्दराज त्रिपाठीको ध्यानाकर्षा गराइएको छ ।
गत जेठ २२ गते पनि बाढीले पुलको केही भागमा क्षति पुर्याएको थियो । नेपाली सेना, सशस्त्र प्रहरी र स्थानीयवासीको सहयोगमा पुल मर्मत गरिएको भएपनि बाढीले पुनः भत्काएको छ ।
