वृहत स्वास्थ्य शिविरमा तीन हजार जनालाई स्वास्थ्य सेवा
भञ्ज्याङ समाचारदाता/भानु
तनहुँको भानु नगरपालिकाले सञ्चालन गरेको वृहत स्वास्थ्य शिविरमा करिब तीन हजार जनाले स्वास्थ्य सेवा लिएका छन् । नगरपालिकाले गत माघ ९ देखि २५ गतेसम्म सञ्चालन गरेको स्वास्थ्य शिविरमा २ हजार ९८१ जनाले स्वास्थ्य सेवा लिएको स्वास्थ्य शाखा प्रमुख ऐश्वर्यचन्द्र भट्टराइले बताए ।
स्वास्थ्य शिविरमा १ हजार ७७० जनाको सुगर परीक्षण, ३६१ जनाको मलेरिया परीक्षण, ८० जनाको खकार परीक्षण, १ हजार २६९ जना महिलाहरुको पाठेघरको मुखको क्यान्सर परीक्षण गरिएको स्वास्थ्य प्रमुख भट्टराइले बताए ।
यस्तै, महिलाहरुको पाठेघारको मुखको क्यान्सर परीक्षण गर्दा २४ जनामा संकास्पद क्यान्सर पत्ता लगाई सम्बन्धित अस्पतालमा थप उपचारका लागि पठाइएको छ । १६९ जना महिलाहरुको पाठेघर खस्ने समस्याको उपचार गरिनुका साथै १९ जना महिलाहरुले परिवार नियोजन सेवा इम्पान्ट र २१ जना महिलाहरुले आई.यु.सि.डि. सेवा लिएका छन् भने ४६७ जनाले दन्तरोग सेवा लिएको बताइएको छ ।
