व्यास नगरपालिकाद्वारा एकीकृत घुम्ती शिबिर सञ्चालन

तनहुँको व्यास नगरपालिकाले एकीकृत घुम्ती शिविर सञ्चालन गरेको छ । नगरप्रमुख बैकुण्ठ न्यौपानेले वडा नं. १ को वडा कार्यालय भवनबाट एकीकृत घुम्ती शिविरको शुभारम्भ गरेका छन् ।

विशेषगरी ग्रामीण क्षेत्रका नगरबासिलाई एकैथलोबाट नगरपालिकाबाट प्रवाह गर्ने सेवा सहज रुपमा प्रदान गर्ने उद्देश्यका साथ एकीकृत घुम्ती शिविर कार्यक्रम सञ्चालनमा ल्याएको नगरप्रमुख न्यौपानले बताए ।

स्वास्थ्य तथा जनसंख्या शाखाबाट बिशेषज्ञ चिकित्सकबाट स्वास्थ्य परीक्षण, पाठेघरको मुख र स्तान क्यान्सर परीक्षण, एचआइभी, टिबि, औलो रोग, मधुमेह, उच्च रक्तचाप परीक्षण हुने व्यास नगरपालिका स्वास्थ्य शाखाका प्रमुख प्रमोद सोतीले बताएका छन् ।

उनका अनुसार स्वास्थ्य चौकीमा २२५ जना नागरिकले पाठेघर सुगर जाँच खकार, स्तान लगायतका परीक्षण गरेका थिए । त्यसैगरी आयुर्वेद स्वास्थ्य तर्फ १२७ जनाले सेवा लिएका थिए । जसमा महिला १०० र पुरुष २७ जनाले सेवा लिएको प्रमुख सोतीले बताए ।

वडा नं १ को कार्यालयबाट सञ्चालनमा ल्याइएको शिविर नगरपालिकाको वडा नं. १ र ५ देखी १४ सम्मका वडाहरुमा सञ्चालन गरिने भएको छ । पुस २० गतेसम्म सञ्चालन गरिने एकीकृत घुम्ती शिविरमा नगरपालिकाबाट सम्पादन हुने विविध कार्यहरु शिविर मार्फ वडाबाटै प्रदान गर्ने व्यवस्था मिलाइएको प्रमुख प्रशाकीय अधिकृत हरिराम नागिलाले बताए ।

व्यास नगरपालिकाको वडा नं. २, ३ र ४ बाहेक सबै वडाहरुमा शिबिर संचालन गरिने नागिलाले बताए । उनका अनुसार प्रशासन शाखाबाट सामाजिक सुरक्षा भत्ता कार्ड बितरण, पञ्जिकरण इकाईबाट व्यक्तिगत घट्ना दर्ताको व्यवस्था मिलाइएको छ ।

यस्तै, योजना शाखाबाट योजना सम्झौता, किस्ता सिफारिस गरिने छ भने कृषि उपशाखाबाट बालीहरुमा देखापर्ने रोगको जैविक बिषदी बितरण, तरकारीका उन्नत बीउ बितरण र कृषकलाई प्राविधिक परामर्श प्रदान गरिने भएको छ । कोभिड-१९ को खोप, आङखस्ने समस्या जाँच र उपचार, औषधी बितरण, स्वास्थ्य समस्याहरुको परामर्श सेवा र दुइबर्ष मूनिका बालबालिकाहरुको बृद्धि अनुगमन र पोषण सम्बन्धी सेवा प्रदान गरिने भएको छ ।

पशु स्वास्थ्य सेवाको लागि उपचार, रोग निदान, माइनर सर्जिकल, पशु स्वास्थ्यका लागि औषधी बितरण र पशु भ्याक्सिन लगायतका सेवा पशुपन्छी उपशाखाबाट प्रदान गर्न व्यवस्था मिलाइएको नगरपालिकाले जनाएको छ । महिला बालबालिका तथा समाजकल्याण उपशाखाबाट ज्येष्ठ नागरिक परिचयपत्र वितरण, अपाङ्गता परिचयपत्र र महिला विकास सम्बन्धी जनचेतना अभिबृद्धि गरिने भएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर