यातायात व्यवस्था कार्यालय डुम्रेलाई साढे २ करोड मूल्य बराबरको जग्गा निःशुल्क प्रदान

डुम्रे : यातायात व्यवस्था कार्यालय डुम्रेको भवन निर्माणका लागि तनहुँको बन्दीपुर गाउँपालिका–१ निवासी कृष्ण अधिकारीले निःशुल्क जग्गा दान गरेका छन् । अधिकारीले करिब साढे दुई करोड मूल्य बराबरको पाँच रोपनी जग्गा मंगलबार मालपोत कार्यालय तनहुँबाट यातायात व्यवस्था कार्यालयको नाममा नामसारी गरिदिएका हुन् ।

भाडामा सञ्चालन हुँदै आएको कार्यालयको भवन निर्माणका लागि जग्गा खोजी गरिएकामा अधिकारीले कार्यालयलाई जग्गा दान गरिएको बन्दीपुर–१ का वडाध्यक्ष शिवकुमार श्रेष्ठले बताए । उनका अनुसार उक्त जग्गाको हालको मूल्य साढे दुई करोड बराबर रहेको छ । यसअघि उनले वडा कार्यालय भवन निर्माणका लागि समेत चार आना जग्गा दान गरेका थिए ।

अधिकारीका दुई छोरा राजेन्द्र र रविन्द्र अधिकारी चितवनमा व्यापार व्यवसाय गर्दै आएका छन्। कार्यालयको भवन निर्माणका लागि राजीखुसीले जग्गा पास गरिदिएको अधिकारीले बताएका छन् ।

यातायात व्यवस्था कार्यालय डुम्रेका प्रमुख गोपाल ओलीले कार्यालयका लागि जग्गा प्राप्ति भएसँगै अब थप प्रक्रिया अगाडी बढ्ने बताए । हाल कार्यालय बन्दीपुर गाउँपालिका–४ विमलनगरमा एक घरमा भाडामा सञ्चालन हुँदै आएको छ । अब उक्त जग्गामा कार्यालय भवन निर्माण भएसँगै सहज हुने उनको भनाइ छ ।

व्यक्तिको घरमा कार्यालय सञ्चालन गर्दा लाखौ रकम खर्च हुने गरेकाले आफ्नै भवन निर्माण गरी सेवा प्रवाह गर्न सहज हुने प्रमुख ओलीले बताए । यातायात व्यवस्था कार्यालयको भवन निर्माणका लागि जग्गा खोजी गर्न बन्दीपुर गाउँपालिकाले घनश्याम श्रेष्ठको संयोजकत्वमा जग्गा खोज समिति गठन गरेको थियो ।

विसं २०७८ फागुन २७ गते स्थापना भएको यातायात कार्यालयमा दरबन्दीअनुसार कर्मचारी नहुँदा सेवा प्रवाहमा समस्या हुँदै आएको छ । दरबन्दी अनुसारका कर्मचारीको अभाव, करारका कर्मचारीका भरमा कार्यालय सञ्चालन गर्नुपर्दा समस्या हुने गरेको जनाइएको छ ।

कार्यालयले विसं २०७९ कात्तिकबाट सवारी चालक अनुमतिपत्रको ट्रायल जिल्लाबाटै सुरू गरेको थियो । त्यसअघि ट्रायलका लागि पोखरा जानुपथ्र्यो। कार्यालयले सोही वर्षको साउन १५ गतेदेखि सवारी चालक अनुमतिपत्र (लाइसेन्स) नवीकरण सुरू गरेको थियो । कार्यालयमा सवारी साधन दर्ता समेत हुन्छ । यसले गर्दा तनहुँ मात्र नभई गोरखा, लमजुङका सर्वसाधारणलाई पनि सहज भइरहेको छ ।

विसं २०७१ देखि यातायात व्यवस्था सेवा कार्यालयका रूपमा काम गर्दै आइरहेको कार्यालय विसं २०७८ फागुन २७ गते यातायात व्यवस्था कार्यालयका रूपमा स्थापना भएको हो । सेवा कार्यालयका रूपमा रहँदा सवारीसाधन कर संकलन, रूटपरमिट, जाँचपास सम्बन्धी काम गर्दै आएको कार्यालयले हाल सवारी चालक अनुमतिपत्र वितरण, नवीकरण र सवारी साधन दर्ता, नामसारी सेवा दिँदै आएको छ ।