तनहुँको प्रसिद्ध धार्मिक स्थल थानीमाईलाई ३४ डोली फूल चढाइयो
भञ्ज्याङ समाचारदाता/भानु
तनहुँको भानु नगरपालिका-७ वसन्तपुरस्थित प्रसिद्ध धार्मिक स्थल थानीमाई मन्दिरमा माघ महिनाको पहिलो मंगलबार ३४ डोली फूल भित्रिएको छ । मन्दिरमा भक्तजनहरुले फूलको डोली चढाएका छन् ।
तनहुँसहित लमजुङ, गोरखा, चितवन लगायतका जिल्लाबाट आएका भक्तजनले बाजागाजासहित फूलको डोली लिएर थानीमाई मन्दिर आउने गर्दछन् । यस्तै, माघको पहिलो मंगलबार करिब तीन हजार बढी भक्तजनहरुले पूजाअर्चना गरेको मन्दिर व्यवस्थापन समितिका अध्यक्ष जीवन थापा मगरले बताए ।
विशेष गरी कात्तिक, मंसिर माघ महिनामा यहाँ भक्तजनहरु फूलको डोली लिएर पूजाअर्चनाका लागि आउने गर्दछन् । यस्तै, मन्दिरमा सोमबार राति १२१ जना भक्तजनले रातभर जाग्राम बसेर बत्ती बालेको समितिले जनाएको छ । दुःखकष्ट पर्दा तथा मनोकांक्षा पुरा होस भनि भाकल गरी पुरा भएपछि भक्तजनहरुले मन्दिरमा फूलको डोली चढाउने गर्दछन् ।
सोमबार सत्यनारायणको पूजा गरी फूलको डोली तयार गर्ने र थानीमाई मन्दिरमा फूलको डोली चढाउने परम्परा रही आएको छ । मन्दिरमा साउन महिना, एकादशी र औँशी बाहेकका दिनमा पूजाअर्चना गर्ने गरिन्छ । सडकको पहुँचले थानीमाई पुग्न सहज भएको छ ।
सडक खुलेपछि भक्तजनहरूको संख्या बढ्न थालेको छ । भक्तजनहरू फूलको डोली र पञ्चेबाजासहित थानीमाई मन्दिरको तीनपटक नाचगान गर्दै परिक्रमा गर्दछन । परिक्रमापछि माथि थुम्कामा रहेको मन्दिर परिसरमा रहेका देवलहरूमा डोलीसँगै लगिएको तोरणलाई तीन फन्का घुमाएर बाँध्ने गरिन्छ । त्यसपछि मन्दिरभित्र प्रवेश गरी आफ्नो मनोकामना भाकल पूरा भएको भन्दै पूजा अर्चना गरिन्छ ।
समुन्द्र सतहबाट एक हजार दुइ सय मिटर उचाइमा अवस्थित मन्दिरबाट गोरखाको लक्ष्मी बजार, लिगलिग कोट, पालुङटार, राइनासकोट लगायत हिमशृंखला अवलोकन गर्न सकिन्छ । विसं १८२५ देखि यस मन्दिरमा पूजाअर्चना सुरु भएको स्थानीयबासी बताउँछन् ।
विसं १८२५ मा मन्दिर भएको ठाउँमा भोटिनी आमाछोरी हावाहुरी चलेपछि एक रुखमा ओत लाग्दा त्यहाँबाट अन्तरध्यान भएको किंवदन्ती रहेको र सोही समयदेखि नै उक्त स्थानमा पूजाअर्चना शुरु भएको जानकारहरु बताउँछन् ।
