विश्व वातावरण दिवस : म्याग्देको टाइगर हिल पार्कमा वृक्षारोपण
भञ्ज्याङ न्यूज
विश्व वातावरण दिवसको अवसरमा तनहुँको म्याग्दे गाउँपालिका-१ स्थित वाराही सामुदायिक वनमा सोमबार वृक्षारोपण गरिएको छ । ‘प्लाष्टिक जन्य प्रदुषण निर्मुल पारौ, वातावरण मैत्री विकल्पको उपयोग गरौ’ भन्ने नाराका साथ डिभिजन वन कार्यालय तनहुँ र सामुदायिक वनको संयुक्त आयोजनामा विभिन्न प्रजातिका बिरुवा रोपण गरिएको हो ।
त्यसक्रममा सामुदायिक वनको टाइगर हिलमा बहुवर्षीय स्टक नर्सरीका विरुवाहरु पारिजात, म्याङगोस्टिक, कपुर, धुपीका करिब दुइ सय बिरुवा रोपिएको सहायक वन अधिकृत काशीराज पण्डितले जानकारी दिए । टाइगर हिल पार्क गाउँपालिकाको उत्कृष्ट प्राकृतिक सौर्न्दर्य रहेको ढुङ्गा पार्कको रुपमा विकास भइरहेको छ । यहाँ मनोरम ढुङ्गाका आकृतिहरु, बेलको रुखमा ग्लास हाउस पर्यटकीय रुख, मानिस विश्रामका लागि गोल घरपाटी रहेको छ ।
पृथ्वी राजमार्गबाट करिब दुइ सय मिटर उत्तर तर्फरहेको उक्त र्टाईगर हिल पार्कमा जान गाउँपालिकाबाट सिढीबाटो निर्माण सम्पन्न भएको छ ।
पर्यटकीय पार्कको रुपमा उच्च संभावना रहेको टाइगर हिल पार्क वाराही सामुदायिक वनले व्यवस्थापन गरिरहेको छ । यहाँ रक क्लाईम्विङ्ग, इको पदयात्रा, रक गार्डेनीङ्ग, भ्यु टावर, वर्ड वाचिङ्ग हाईकिङ्ग समेतको सम्भावना देखिन्छ ।
वन ऐन र नियमावलीमा समेत सामुदायिक वनले पर्या पर्यटकको लागि पार्क सञ्चालन गर्न सकिने कानुनी प्रावधान रहेको डिभिजन वन कार्यालयका प्रमुख कोमलराज काफ्लेले बताए ।
त्यसक्रममा आयोजित कार्यक्रममा डिभिजन वन कार्यालयका प्रमुख काफ्लेले प्लाष्टिकलाई सके बहिष्कार नसके न्यूनीकरण गर्नुपर्नेमा जोड दिए ।
सामुदायिक वन महासंघ (फेकोफोन) तनहुँका अध्यक्ष विष्णुप्रसाद श्रेष्ठले स्थानीय स्तरमा वातावरण संरक्षणको जिम्मा लिएको वन उपभोक्ता समूहले यस्ता प्रदुषण नियन्त्रणका कार्यक्रमको पहल कदमी लिनुपर्ने बताए ।
विश्वमा प्रति वर्ष ५०० मिलियन टन प्लाष्टिक उत्पादन भई रहेको र हामीले फालेको प्लाष्टिकले हरेक बर्षसमुन्द्रमा फोहोरको डङ्गुर लागि समुन्द्र खतरामा परेको सहभागिलाई जानकारी गराइएको थियो ।
