१८ घण्टापछि एकतर्फी खुल्यो पृथ्वी राजमार्ग
भञ्ज्याङ न्यूज
पृथ्वी राजमार्ग अन्तरगत धादिङको धार्केमा पुलको छेउमा जमिन भासिएर अवरुद्ध बनेको सडक एकतर्फी खुलेको छ ।
धुनिवेशी नगरपालिका–६ र थाक्रे गाउँपालिका–८ को सिमाना जोड्ने गणेश खोला पुलमा सोमबार अपरान्ह ४ बजेदेखि ठप्प बनेको राजमार्ग मंगलबार बिहान १० बजेबाट एकतर्फी खुलाएको हो ।
भासिएको ठाउँमा ग्याविन जाली भरेर एकतर्फी गाडी संचालनमा ल्याइएको जिल्ला प्रहरी कार्यालय धादिङका प्रहरी नायव उपरिक्षक शन्तुलाल प्रसाद जैसवारले जानकारी दिए । नेपाल प्रहरी, नेपाली सेना र स्थानीयले रातभरी पनि काम गरेका थिए ।
यातायात ठप्प हुँदा धार्के र धार्के आसपासमा लागेको सबारी जाम हटाउन हम्मेहम्मे छ । पुर्व पश्चिमका जिल्लाबाट रातीको समयमा धादिङ आइपुगेका सवारीलाई प्रहरीले चौकी र बजार क्षेत्र आसपासमा रोकेर राखेको छ ।
पुर्व पश्चिमबाट राजधानी काठमाडौ आउदै गरेका सवारीलाई प्रहरीले धादिङको जोगिमारा, मलेखु, घाटबेसी, आदमघाट लगायतका बजार र प्रहरी चौकी आसपासमा राखिएको छ । बाटो एक तर्फी खुलाइएपनि तत्कात सहजै बाटो पास गर्न कठिन छ । सयौं सवारीहरु सडकमा रोकिएकोले ती गाडीहरु पार गराउन अझै केही घण्टा लाग्ने प्रहरीको भनाई छ ।
