सामुदायिक सिकाई केन्द्रको १७औं साधारणसभा सम्पन्न

तनहुँको भानु नगरपालिका-९ बाइसजागर स्थित पुर्कोट सामुदायिक सिकाई केन्द्रको १७औं साधारणसभा सम्पन्न गरिएको छ । केन्द्रको साधारणसभालाई सम्बोधन गर्दै भानु नगरपालिकाका नगरप्रमुख आनन्दराज त्रिपाठिले महिलालाई साक्षर बनाउन सामुदायिक सिकाई केन्द्रको भूमिका महत्वपूर्ण रहेको बताए ।

‘हिजोका दिनमा सामुदायिक सिकाई केन्द्रको ठूलो भूमिका रहेको र भोलीका दिनमा भानु भित्र सामुदायिक सिकाई नपुगेका वडामा पनि छिट्टै केन्द्र खोल्ने योजनामा छौं’, नगरप्रमुख त्रिपाठीले भने, ‘समाजमा चेतनाको स्तर वृद्धिका लागि सिकाई केन्द्रको भुमिका महत्वपूर्ण हुने र यसका लागि नगरपालिकाबाट आवश्यक सहयोग र सहकार्य हुनेछ ।’

पुर्कोट सामुदायिक सिकाई केन्द्रका अध्यक्ष बिनोद कुमार श्रेष्ठको अध्यक्षतामा आयोजित कार्यक्रममा भानु नगर प्रबक्ता इश्वर बहादुर घिमिरे, भानु-९ का अध्यक्ष मीन गुरुङ, भानु-१० का अध्यक्ष हरिहर उप्रेती, नगर शिक्षा सचीव ध्रुबराज पौडेल लगायतले सामुदायिक सिकाई केन्द्रको महत्वका विषयमा चर्चा गरेका थिए ।

यस सिकाई केन्द्रले भानु-८ र ९ वडामा कृषि, शिक्षा र महिला समूह गठनमा र इन्टरनेट सेवा प्रदान गर्दै आएको छ । २०६२ सालमा स्थापन भएको यस संस्थामा हालसम्म १ हजार ८०० सदस्य रहेका छन् । सिकाई केन्द्रले बाख्रा पालन, तरकारी खेती र मौरी पालनमा काम गर्दै आएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर