व्यास -२ स्थित दमौली ट्रेड सेन्टरलाई पार्क बनाउनुपर्ने वडाबासीको माग
भञ्ज्याङन्युज/दमौली
व्यास नगरपालिका-२ गणेशमानचोकस्थित दमौली ट्रेड सेन्टरलाई पार्क बनाउनुपर्ने वडाबासीले माग गरेका छन् । ट्रड सेन्टरको व्यापारिक सटर जिल्ला समन्वय समितिले भाँडामा लगाउने तयारी गरेपछि वडावासीले विरोध जनाइ उक्त स्थानमा खुल्लामा खुल्ला पार्क बनाउनुपर्ने माग गरेका हुन् ।
ट्रेड सेन्टर आगामी असार मसान्तपछि जिल्ला समन्वय समितिको स्वामित्वमा आउने र साउन १ गतेदेखि जिससले प्रतिस्पर्धाबाट पुनः भाँडामा लगाउने तयारी गरेको छ । मंगलबार पत्रकार सम्मेलन गरी वडावासीले जिससको उक्त तयारीप्रति आपत्ति जनाएका छन् । टोलविकास समितिले जिससको ट्रेड सेन्टर पार्कलाई पुन : भाँडामा लगाउने कार्यमा पुर्नविचार गर्नुपर्ने बताएका छन् ।
‘विसं २०६९ सालमा जिल्ला समन्वय समितिले दिपेश बस्नेतलाई सम्झौता गरी उक्त ठाउँमा व्यापारिक सटर बनाउन दिँदा पनि हामीले विरोध गरेका थियौ’, व्यास-२ का वडा सदस्य सुरेश वाग्लेले भने, ‘जबरजस्ती खुल्ला ठाउँलाई व्यापारिक सटर बनाइयो । ५ वर्षका लागि दिइएकामा पुनः ५ वर्ष बिना प्रतिस्पर्धा म्याद थप गरियो । बढ्दो जनघनत्वसँगै वडाभित्र खुल्ला ठाउँ नरहेकाले उक्त ठाउँलाई पार्कको रुपमा विकास गर्नुपर्छ ।’
उक्त जग्गा जिससको स्वामित्वको रहेपनि वडासँग पनि सरोकार भएकाले समन्वय समितिले वडावासीहरुसँग सहकार्य गर्नुपर्ने उनीहरुको माग छ । यस्तै, १७ वटै टोल विकास संस्थाको संयुक्त भेलाले सो स्थानमा व्यापारिक प्रयोजनका लागि बनाइएको ट्रेड सेन्टरका संरचना भत्काएर बाल बगैंचा निर्माणका लागि हस्ताक्षर भएको वाग्लेले बताए । उनले भने, ‘यो वडा घनाबस्ती भएको ठाउँ हो, विपद् आएका बेला खुल्ला ठाउँ छैन । त्यसलाई मध्यनजर गरी पार्क बनाउनुपर्छ भन्ने सबैको भावना हो ।’
