दलित समुदायका लागि ३ दिने कर्मकाण्ड तालिम

तनहुँको व्यास नगरपालिका भित्रका दलित समुदायका लागि शुक्रबारदेखि तीन दिने कर्मकाण्ड तालिम गरिएको छ । परिवर्तनका लागि मिडियाको आयोजना तथा व्यास नगरपालिकाको आर्थिक सहयोगमा व्यासका १४ वटै वडाबाट एक/एक जनाको प्रतिनिधित्व हुने गरी १४ जनालाई उक्त तालिम प्रदान गरेको हो । यो तालिम व्यासमा पहिलो पटक आयोजना गरिएको हो ।

तालिमको उद्घाटन गर्दै व्यास नगरप्रमुख बैकुण्ठ न्यौपानेले समाजमा कर्मकाण्ड गर्ने जनशक्तिको अभाव रहेको बेला यो तालिम फलदायि हुने बताए । दलित समुदायमा मात्रै नभई ब्राहृमण समुदायमा पनि कर्मकाण्ड गर्ने व्यक्तिको अभाव खडि्कएको अवस्थामा यस किसिमको तालिम उपलव्धिमूलक हुने उनको भनाइ थियो । दलितमैत्री र छुवाछुतमुक्त नगरपालिका स्थापित गराउने बिषयमा व्यास नगरपालिका प्रतिबद्ध भएर लाग्दै आएको समेत उनले बताए ।

कार्यक्रममा जिससका पूर्व सदस्य केशबहादुर सुनारले सिकेका सीपलाई व्यवहारमा लागु गर्न सकिए उपलव्धिमूलक हुने बताए । यस तालिमको समापन पश्चात तालिमको समिक्षा गर्दै यस्ता तालिमलाई निरन्तरता दिनुपर्ने उनको जोड थियो । सोही अवसरमा नेपाल सुनचाँदी व्यवसायी संघका अध्यक्ष बिनोद कुमार बिक विकासले दलित समुदायप्रति गरिने बिभेद र छुवाछुत अमानवीय कार्य भएको बताए ।

व्यास नगरपालिका कार्यपालिका सदस्य चन्द्रमाया परियारको सभापतित्वमा आयोजित कार्यक्रममा व्यास कार्यपालिका सदस्य रनसिं नेपाली, ज्ञानुमाया सुनार, व्यास-३ का वडासदस्य दधिराज घिमिरे, दलित नेता कृष्ण रुचाल, माँ दुर्गे अलोकिक कृषि फार्मकी संचालिका कल्पना गौली, महिला विकास कार्यालयकी पूर्व कर्मचारी रेणु नेपाली लगायतका वक्ताहरुले जातीय विभेद अन्त्यका लागि आचारण र व्यवहारमा परिवर्तन हुन आवश्यक रहेको औल्याएका थिए ।

कार्यक्रममा मुख्य प्रशिक्षकमा तुलसीराम पौडेल र सहायक प्रशिक्षकमा तिलक बिक र पूर्ण बिश्वकर्माले कर्मकाण्डका विषयमा सहजिकरण गरेका थिए ।

सेयर गर्नुहोस्

प्रतिक्रिया दिनुहोस्

सम्बन्धित खवर