तनहुँमा एक लाख बढीले लगाए कोरोना विरुद्धको खोप, दुइ पालिकामा कोरोना संक्रमित शून्य

तनहुँमा एक लाख बढीले कोरोना भाइरसविरुद्धको खोप लगाएका छन् । जिल्लाका एक लाख आठ हजार ३०१ जनाले कोरोना विरुद्धको पहिलो मात्रा लगाएका छन् । दुवै मात्रा लगाउनेको संख्या ६५ हजार आठ सय ३८ रहेको छ । जिल्लामा विभिन्न चरणमा कोभिशिल्ड, भेरोसेल, जोन्सोन, एष्ट्राजेनेका खोप अभियान सञ्चालन हुँदै आएको छ । त्यसक्रममा ४५ वर्षाथिका नागरिक, १८ वर्षाथिका विद्यार्थी, व्यवसायी, पत्रकार, सुरक्षा निकाय, कर्मचारी लगायतलाई प्राथमिकताका आधारमा खोप लगाइएको स्वास्थ्य कार्यालय तनहुँले जनाएको छ ।

यस्तै, तनहुँका दश स्थानीय तहमध्ये दुइ गाउँपालिकामा कोरोना संक्रमित शून्य भएको छ । देवघाट र आँबुखैरेनी कोरोना संक्रमणमुक्त गाउँपालिका भएको हो । देवघाटका ९० र आँबुखैरेनीका १११ संक्रमित निको भएको स्वास्थ्य कार्यालय तनहुँले जनाएको छ । दोस्रो लहरको कोरोना संक्रमण सुरु भएपछि देवघाटका एक र आँबुखैरेनीका एक संक्रमितको मृत्यु भएको छ ।

जिल्लामा अहिले सक्रिय संक्रमितको संख्या ४७ रहेको कार्यालयका जनस्वास्थ्य अधिकृत कुसुम श्रेष्ठले जानकारी दिइन् । भानुमा ५, व्यासमा १३, शुक्लागण्डकीमा १६, भिमादमा तीन, म्याग्देमा ६, घिरिङमा एक, ऋषिङमा एक र बन्दिपुरमा एक सक्रिय संक्रमित छन् । सबै संक्रमित होम आइसोलेशनमा छन् ।

जिल्लामा हालसम्म पाँच हजार तीन सय ७५ जनामा संक्रमण पुष्टि भएकामा पाँच हजार दुइ सय चार जना निको भएका छन् । यसक्रममा एक सय २४ संक्रमितको मृत्यु भएको कार्यालयले जनाएको छ ।

त्यस्तै, गण्डकी प्रदेशमा हालसम्म नौ लाख १० हजार चार सय १५ ले पहिलो मात्रा लगाएका छन् भने दुवै मात्रा लगाउनेको संख्या छ लाख २२ हजार नौ सय ६७ रहेको छ । गोरखामा ७८ हजार ३१ ले पहिलो र ५६ हजार एक सय नौ ले दुवै, कास्कीमा दुइ लाख ७८ हजार दुइ सय ९७ ले पहिलो र एक लाख ८८ हजार छ सय २९ ले दुवै, लमजुङमा ६९ हजार सात सय ६७ ले पहिलो र ५० हजार नौ सय ८५ ले दुवै मात्रको खोप लगाएका छन् ।

नवलपुरमा एक लाख आठ हजार ६३ ले पहिलो र ६९ हजार पाँच सय ९६ ले दुवै, बागलुङमा ७४ हजार एक सय १५ ले पहिलो र ५० हजार तीन सय ७२ ले दुवै, म्याग्दीमा ३९ हजार पाँच सय ३२ ले पहिलो र २१ हजार तीन सय ३६ ले दुवैमात्रको खोप लगाएका छन् ।

यस्तै, पर्वतमा ४४ हजार चार सय १८ ले पहिलो र ३७ हजार तीन सय ८६ ले दुवै, स्याङ्जामा ९८ हजार चार सय ४० ले पहिलो र ७१ हजार आठ सय ४३ ले दोस्रो, मनाङमा पाँच हजार ८८ ले पहिलो र चार हजार चार सय ७९ ले दोस्रो, मुस्ताङमा छ हजार तीन सय २७ ले पहिलो र छ हजार तीन सय ९४ ले दुवै मात्रा लगाएका छन् ।

सेयर गर्नुहोस्

प्रतिक्रिया दिनुहोस्

सम्बन्धित खवर