आदिकवि भानुभक्त क्याम्पसको वार्षिकोत्सव : सामुदायिक क्याम्पसको विकासमा सरकार प्रतिबद्ध छ : मुख्यमन्त्री पाण्डे

तनहुँको दमौली स्थित आदिकवि भानुभक्त क्याम्पसले सोमबार ३७औं वार्षिकोत्सव कार्यक्रम गरेको छ । क्याम्पसको वार्षिकोत्सव समारोहको उद्घाटन गर्दै गण्डकी प्रदेशका मुख्यमन्त्री सुरेन्द्रराज पाण्डेले सामुदायिक क्याम्पसको विकासका लागि प्रदेश सरकार प्रतिबद्ध रहेको बताए ।

‘सामुदायिक क्याम्पसको स्तरोन्नति र पूर्वाधार निर्माणमा सरकारले सहयोग गर्नेछ’, मुख्यमन्त्री पाण्डेले भने, ‘शिक्षाको गुणस्तर अभिवृद्धिका लागि प्रदेश सरकार लागि परेको छ । शैक्षिक क्षेत्र गुणस्तर बनाउन नसकिए मुलुकको भविष्य अन्धकार हुन्छ । मुलुकलाई चाहिने जनशक्ति उत्पादन गर्ने थलो शैक्षिक क्षेत्र हो, त्यसको दायित्व सरकारले लिनैपर्छ ।’

मुख्यमन्त्री पाण्डेले सामुदायिक क्याम्पसको विकासको दायित्व सरकारले लिनुपर्छ भनेर यसलाई नीति तथा कार्यक्रममा समावेश गरिएको बताए । सामुदायिक क्याम्पससँग प्रदेश सरकार कार्यक्रम अगाडि बढाइएको भन्दै उनले यो कार्यक्रममार्फत अनुदानको व्यवस्था गरिने बताउँदै उनले भने, ‘सीमित स्रोत र साधनलाई असीमित चाहनासँग लय मिलाउँदै केही सहयोग गरिनेछ ।’

प्रदेशभित्रका ९० वटा सामुदायिक क्याम्पसका आवश्यकता सम्बोधनका लागि सरकारले रु पााँच करोड विनियोजन गरिएको उनले जानकारी गराए । मुख्यमन्त्री पाण्डेले भने, ‘राज्यले धेरै क्षेत्रमा लगानी गरेको छ । हरेक क्षेत्रको दायित्व सरकारले बेहोर्नुपर्छ भन्ने मानसिकता विकास भइरहेको छ । विशेषगरी शैक्षिक र स्वास्थ्यको दायित्व सरकारले लिनैपर्छ ।’

कार्यक्रममा गण्डकी प्रदेशका आर्थिक मामिलामन्त्री जीतप्रकाश आलेले शिक्षाको गुणात्मक विकासका लागि स्थानीय तह अग्रसर हुनुपर्नेमा जोड दिए । उनले भने, ‘सामुदायिक क्याम्पसको मर्मका बारेमा आफू जानकार रहेको छ । कार्यविधि बनाएर सामुदायिक क्याम्पसलाई अनुदान दिने नीति सरकारले लिएको छ ।’

मन्त्री आलेले भने, ‘सामुदायिक क्याम्पसमा विभिन्न समस्या छ, त्यो समस्याबारे म आफैँ जानकार छु, सामुदायिक क्याम्पसको विकासका लागि सरकार गम्भीर छ ।’ ‘माध्यमिक तहको शिक्षा सुदृढीकरणका लागि प्रदेश सरकार स्थानीय तहसँग सहकार्य गर्न तयार रहेको छ’, उनले भने, ‘जहाँ विद्यार्थी छन् त्यहाँ पूर्वाधार छैन, जहाँ पूर्वाधार छ त्यहाँ विद्यार्थी छैनन् । यस्तो अवस्थाको अन्त्यका लागि सरकारले प्रयास गरेको छ ।’

शिक्षा क्षेत्रमा आमूल परिवर्तन आवश्यक रहेको बताउँदै उनले जीवन उपयोगी शिक्षा र मुलुकलाई चाहिने जनशक्ति उत्पादन गर्ने शिक्षा आवश्यक रहेकामा मन्त्री आलेले जोड दिए ।

गण्डकी प्रदेशससभा सदस्य एवं नेकपा (माओवादी) केन्द्र संसदीय दलका नेता हरिबहादुर चुमानले सामुदायिक क्याम्पसमा भुइँ तहका जनताका छोराछोरी अध्ययन गर्ने भएकाले यसको विकासमा सरकारले विशेष ध्यान दिनुपर्ने बताए। उनले शिक्षा र स्वास्थ्यमा समाजवाद देखाउनुपर्ने अहिलेको आवश्यकता रहेकोमा जोड दिए । गण्डकी प्रदेशसभा सदस्य अशोककुमार श्रेष्ठले सामुदायिक क्याम्पसको विकासका लागि प्रदेशले अनुदान दिने नीति ल्याएको उल्लेख गरे ।

यस्तै, व्यास नगरपालिकाका प्रमुख वैकुण्ठ न्यौपानेले सामुदायिक क्याम्पसलाई सम्बोधन हुने गरी अलग विश्वविद्यालयको प्रावधान अगाडि बढाउन माग गरे । उनले आग्रह पूर्वाग्रहबाट माथि उठेर क्याम्पसको विकासका लागि सबै पक्ष लागिरहेको उल्लेख गरे ।

जिल्ला समन्वय समिति तनहुँका प्रमुख शान्तिरमण वाग्लेले समाजले माग गरेका शिक्षा क्याम्पसले प्रदान गर्दै आइरहेको बताए । म्याग्दे गाउँपालिकाका अध्यक्ष श्रीप्रसाद श्रेष्ठले शैक्षिक केन्द्रका रूपमा विकास भइरहेको क्याम्पसको शैक्षिक गुणस्तर वृद्धिलाई जोड दिनुपर्ने बताए । उनले क्याम्पसलाई साझा शैक्षिक केन्द्रका रूपमा विकास गर्नुपर्ने बताए । ऋषिङ गाउँपालिकाका अध्यक्ष राजेन्द्रकृष्ण श्रेष्ठले क्याम्पस गण्डकी प्रदेशकै अब्बल क्याम्पसको रूपमा विकास भइरहेको उल्लेख गरे ।

कार्यक्रममा प्रमुख जिल्ला अधिकारी छवि रिजाल, नेकपा -एमाले) गण्डकी प्रदेश कमिटी सदस्य श्रीराम कार्की, नेकपा (एकीकृत समाजवादी) का पोलिटब्युरो सदस्य प्रतापलाल श्रेष्ठ, नेकपा (माओवादी केन्द्र)का जिल्ला संयोजक ओमराज आले लगायतले शिक्षाको विकासमा प्राध्यापक, विद्यार्थी र अभिभावकको महत्वपूर्ण भूमिका रहने बताए ।

क्याम्पस प्रमुख महाप्रसाद हड्खलेले क्याम्पसलाई शैक्षिक एवं आर्थिकरूपमा सबल बनाउन प्रयासरत रहेको बताउँदै क्याम्पस देशकै उत्कृष्ट संस्थाका रूपमा विकास भइरहेको बताए । क्याम्पसले करिब चार सय विद्यार्थीलाई छात्रवृत्ति प्रदान गर्दै आएको उनले बताए ।

वार्षिकोत्सवका अवसरमा क्याम्पसलाई सहयोग पुर्‍याउने म्याग्दे गाउँपालिका-२ उमाचोक निवासी प्रा डा ध्रव अधिकारीलाई मुख्यमन्त्री पाण्डेले सम्मान गरेका छन् । विसं २०४३ मा स्थापित क्याम्पसमा व्यास नगरपालिका, ऋषिङ गाउँपालिका, म्याग्दे गाउँपालिका, बन्दीपुर गाउँपालिकाका अतिरिक्त छिमेकी जिल्लाबाट विद्यार्थी पठनपाठनका लागि आउने गरेका छन् ।

क्याम्पसमा व्यवस्थापन विषयमा कक्षा ११/१२, स्नातक तहमा बिएड, बिबिएस र बिबिए र स्नातकोत्तर तहमा एमबिएस पढाइ हुँदै आइरहेको छ । हाल क्याम्पसमा करिब तीन हजार एक सय विद्यार्थी अध्ययनरत रहेको क्याम्पसले जनाएको छ।

सेयर गर्नुहोस्

प्रतिक्रिया दिनुहोस्

सम्बन्धित खवर