वेलचौतारामा शुक्लागण्डकी भेटेरिनरी अस्पताल निर्माण

तनहुँको शुक्लागण्डकी नगरपालिका भेटेरिनरी अस्पताल निर्माण गरिएको छ । नगरपालिकाको वडा नं. ५ वेलचौतरामा नेपाल लाइभस्टक सेक्टर इनोभेसन आयोजनाको सहयोगमा उक्त अस्पताल निर्माण गरिएको हो ।

आयोजनाले मूल्य अभिवृद्धि कर बाहेक एक करोड २५ लाख १५ हजार लागतमा अस्पतालको एक तले भवन निर्माण गरेको छ । देशभर २८ वटा पालिकामा भवन निर्माण गरिएको आयोजनाका निर्देशक डा रामनन्दन तिवारीले बताए । आयोजनाले पशु स्वास्थ्य, नश्ल सुधार, खोप आपूर्ति लगायतका क्षेत्रमा कार्य गर्दै आएको छ ।

अस्पताल भवनबाट आधारभूत प्रयोगशाला सेवा, पशुचिकित्सक सेवा, सर्जरी तथा बन्ध्याकरण लगायतका सेवा प्रदान गरिने पशुसेवा शाखा शुक्लागण्डकीका प्रमुख मुक्तिराम पौडेलले जानकारी गराए। आयोजनाले तनहुँको बन्दिपुर र शुक्लागण्डकीमा पनि अस्पताल भवन निर्माण गरिएको छ ।

यस्तै, उक्त अस्पताल भवनको शुक्रबार उद्घाटन गर्दै कृषि तथा पशुपंक्षी विकासमन्त्री डा बेदुराम भुसालले सरकारले कृषि तथा पशुको स्वास्थ्यको विषयलाई प्राथमिकता दिएको बताएका छन् ।

‘पशुको स्वास्थ्यको विषयलाई अहिलेको सरकारले महत्व दिएको छ’, उनले भने, ‘पशुको मासु र पशुजन्य उत्पादन मानिसले प्रयोग हुने भएकाले पशु स्वस्थमा विशेष ध्यान दिनुपर्छ ।’ ‘हामी जति मानवको स्वास्थ्यको बारेमा सचेत छौँ, त्यसको एक प्रतिशत पनि पशुको स्वास्थ्यको बारेमा प्राथमिकता दिएको पाउदैनौँ ।

अहिलेको सरकार पशु स्वास्थ्यको क्षेत्रमा पनि काम गर्नुपर्छ भनेर लागि रहेको छ’ मन्त्री भुसालले भने, ‘नेपालमा कृषि र पशुपालननै कृषिको मुख्य आम्दानीको स्रोत भएको हुँदा सरकारले यसैलाई प्राथमिकता दिएको छ ।’

गण्डकी प्रदेशका कृषि तथा भूमि व्यवस्थामन्त्री महेन्द्रध्वज जिसीले सीमित स्रोत र साधनबाट प्रदेश सरकारले काम गरिरहेको बताउँदै किसानका समस्या पहिचान गरी समाधान गर्दै जाने प्रतिबद्धता जनाए । कार्यक्रममा शुक्लागण्डकी नगरपालिकाका नगरप्रमुख कृष्णराज पण्डितले तीनै तहका सरकारले वास्तविक किसानलाई प्रोत्साहन गर्न नसके पलायन हुन सक्ने बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर