व्यास नगरपालिकाको ५ र ७ वडा जोड्न मादी नदीमाथि मोटरेवल पुल निर्माण

दुइ वडा जोड्नका लागि मादी नदीमाथि मोटरेबल पुल निर्माण थालिएको छ । तनहुँको व्यास नगरपालिका-५ र ७ जोड्न मोटरेबल पुल निर्माण थालिएको हो । संघीय सरकारमार्फत सडक विभागले नै यहाँ पुल निर्माण गरिरहेको छ । उक्त पुल निर्माणका लागि नदीको दुवैतर्फ पिल्लर राख्ने काम भइरहेको एम/एस इन्दे्रणी निर्माण सेवा प्रालिका सञ्चालक बलबहादुर रानामगरले बताए । उनले भने, ‘नदीको बहाव कम भएको अवस्थामा नै काम गरिरहेका छौं ।’

‘फाउन्डेसन र सबस्ट्रक्चर, डेक स्लाप, रोड एसेस र नदी संरक्षणसहितको काम गर्नेछौँ । यही हाम्रो मुख्य काम हो । विकाससँगै नदी संरक्षण हाम्रो दायित्व हो । सोही अनुसार काम गरिरहेका छौँ’, उनले भने, ‘पुल समयमा नै निर्माण गर्ने उद्देश्यले तीव्र गतिमा काम भइरहेको छ ।’

१२५ मिटर लम्बाइ र ११ मिटर चौडाइको पुल निर्माण गरिने छ । विसं २०७९ पुस १४ मा रु २० करोड नौ लाख ५३ हजार तीन सयमा ठेक्का सम्झौता भएको थियो । उक्त पुल निर्माणको काम विसं २०८२ पुस ६ मा सकिने गरी सम्झौता भएको छ । साबिक श्याम्घा र क्यामिन गाविसलाई जोड्नका लागि विसं २०५२ मा झोलुङ्गे पुल निर्माण गरिएको थियो । झोलुङ्गे पुल निर्माण भएपछि पैदल यात्रा सहज भए पनि सामग्री ढुवानीमा सकस हुँदै आएको थियो । एउटा गाउँबाट अर्को गाउँमा सामग्री ढुवानी गर्नुभएको सकसको अन्त्यका लागि स्थानीयबासी लागिपरेका थिए ।

विसं २०६३ पुस ३ गते कृष्णप्रसाद घिमिरेको संयोजकत्वमा बसेको १९१ जनाको भेलाले मोटरेवल पुलको माग गरेको थियो । उक्त समितिले तत्कालीन सरकारसँग पटक-पटक मोटरेबल पुलको माग तथा प्रस्ताव पेस गर्दै आएको थियो । समितिले विसं २०६३ मा राष्ट्रिय योजना आयोगमा मोटरेबल पुलको मागसहित पुगेको स्थानीय प्रदीप घिमिरेले बताए ।

उनका अनुसार तनहुँ टुहुरे-पुसल-कलेस्ती मार्ग अन्तर्गत कलेस्ती बजार वरपर मादी नदीमा एक मोटरेबल पुल निर्माण गरिनुपर्नेमा जोड दिइएको थियो । यस क्षेत्रका उपभोक्तालाई सहजरूपमा सामान र मानिस सवारीसाधनबाट वारपार गर्न मोटरेबल पुलको माग गर्ने निर्णय समितिले गरेको थियो । यस निर्णयसहित कृष्णप्रसाद घिमिरे, मायानाथ कोइराला, प्रदीप घिमिरे, वर्तमान वडाध्यक्ष कृष्णप्रसाद न्यौपानेलगायतको टोली योजना आयोगमा मोटरेबल पुलको माग गर्न पुगेका थिए । पटक-पटकको माग १७ वर्षपछि बल्ल पूरा हुँदै गएको घिमिरेले बताए । पुल निर्माणपछि यहाँका स्थानीयले सामान ढुवानी र मानिस आवतजावतमा नै सवारीसाधन उपयोग गर्न पाउने भएका छन् ।

पुल निर्माणले व्यास-५ चिन्टुटारका स्थानीय बढी लाभान्वित हुने भएका छन् । यस क्षेत्रमा पुग्न सडक भएपनि पुल नहुँदा घुम्ती बाटो उपयोग गर्नुपर्ने बाध्यता हट्ने भएको छ । यहाँका स्थानीयले जोखिम मोलेर नै झोलुङ्गे पुलमार्फत दुइपाङ्ग्रे सवारीसाधनमार्फत सामग्री ढुवानी र आवतजावत गर्ने गरेका थिए । झोलुङ्गे पुल भएकै स्थानमा मोटरेबल पुल निर्माण हुन थालेपछि यहाँका स्थानीयमा खुसी छाएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर