“भञ्ज्याङ” प्रकाशन आजबाट ४३औं वर्षमा प्रवेश

नारायण खड्का : सम्पादक

‘भञ्ज्याङ’ले आजबाट आफ्नो प्रकाशनको ४३ वर्षको यात्रा शुरु गरेको छ । वि.सं. २०३९ सालमा कास्कीको पोखरामा साप्ताहिकबाट प्रकाशन शुरु गरेको ‘भञ्ज्याङ’ले वि.सं. २०५९ सालदेखि ‘दैनिक’मा रुपान्तरण भई तनहुँको सदरमुकाम दमौलीबाट प्रकाशन भएको हो ।

नेपाली पत्रकारिता क्षेत्रको इतिहासका रुपमा आफ्नो अलग पहिचान बनाउन सफल भएको छ । यो यात्रा तय गर्नु आफैमा चुनौतीपूर्ण थियो र छ । तनहुँको सदरमुकाम दमौलीबाट “भञ्ज्याङ पब्लिकेशन प्रा.लि.” मार्फत “भञ्ज्याङ दैनिक” प्रकाशित हुँदै आएको छ । पत्रिकाले बिगतका घटना र वर्तमानका परिकल्पनालाई फर्किएर हेर्दा धेरै उतारचढाभका साथै संघर्षशिल इतिहास बनाएको र बन्न पुगेका छन् । मुलुकमा भएका विभिन्न कालखण्डहरुमा जोखिमको सामनासँगै समाधानको खोजी गर्दै आमपाठकको चाहानालाई साथ र सहकार्य गर्दै भञ्ज्याङले आफ्नो यात्रालाई निरन्तरता दिंदै आएको छ । परिवर्तनका निम्ति मुलुकमा भईरहने राजनीतिक मुद्दाले बेलाबखत उथलपुथल बनाउने गरेको छ ।

बिगतका घटनाक्रमलाई तुलनात्मक रुपमा वर्णन गर्ने अवस्था भने छैन । नेपाल र नेपाली जनतामाझ जोडिएको विकास निर्माण र समृद्धिका लागि भएका संघर्षले संघ, प्रदेश र स्थानीय तहको संरचना तयार भएका छन् । मुलुकको भौगोलिक विविधता, सांस्कृतिक, जातीय पहिचानका भेषभूषा जीवनत राख्नु देशको पहिचान हो । यो पहिचानलाई आत्मसाथ गर्दै भञ्ज्याङले साथमा साथ र काँधमा काँध मिलाएर अगाडि बढ्दै आएको छ । प्राकृतिक सौन्दर्यताले भरिपूर्ण हिमाल, पहाड र तर्राईसम्म बसोवास गर्ने आम नेपालीलाई सिंहदरबारको अधिकार घरआँगनसम्म पुर्‍याउने लक्ष्यका साथ जनताको घरदैलोको सरकारका रुपमा परिचित स्थानीय तह अगाडि बढिरहेको छ । तीनै तहका सरकारको मुख्य लक्ष्य भनेको जनता र मुलुकलाई समृद्ध बनाउनुनै हो ।

यस पत्रिकाले ४३औं खुड्किलो टेक्दै गर्दा आधुनिक प्रविधिका साथै नयाँ मिडियाले आफ्नो पकड जमाइसकेको छ । प्रविधिका कारण सेकेण्ड भरमा दुनियाको खबर क्षणभरमै सबैको पहुँचमा पुग्न थालेका छन् । प्रविधिको विकाससंगै लिथो, लेटरप्रेस हुँदै पोलि र मेटल प्लेटसंगै अहिले आधुनिक मेशिनबाट छापा माध्यमका पत्रपत्रिकाहरु प्रकाशित हुन्छन् । तर, प्रविधिको विकासले पछिल्लो समय छापा सञ्चार माध्यमलाई भने केही चुनौती थप्नुका साथै थप परिस्कृत हुन सचेत गराएको छ । सत्य, तथ्यमा आधारित रहि मुलुकभर छरिएका सामाग्रि टिपनटापन गर्दै ४२ वर्ष अघिदेखि भञ्ज्याङ पत्रिका अनवरत यात्रामा छ । टुक्राटुक्रा हत्केलामा जम्मा गर्दै यथार्तपरक रुपले आम नागरिकको हातहातमा पुगि रहेको छ ।

व्यक्तिविशेष पत्रकारिता नभई स्वतन्त्रतापूर्वक विषयगत बस्तुलाई प्राथमिकतामा राखि प्रकाशन माध्यमद्वारा पाठकको माझमा छर्लङ्ग हुने प्रयास निरन्तर चल्दै छ र चलिरहने छ । शहरदेखि ग्रामीण बस्तिसम्म सम्भावना बोकेका सम्भावित स्थानलाई ग्रामीण पर्यटन प्रवर्द्धन गर्न तथा स्थानीय कला संस्कृतिको संरक्षण, प्रवर्द्धनका साथै विकास निर्माण, अनियमितताका विषयमा खबरदारी गर्दै सम्बन्धित निकायलाई घच्घचाउँदै विकास र समृद्धिको बाटोमा मुलुक, समाजलाई डोर्‍याउने काम भञ्ज्याङ पत्रिकाले गर्दै आईरहेको छ । उकाली र ओराली हिड्दै गरेका यात्रीले थकाई मार्न भञ्ज्याङका चौतारीमा बिश्राम गर्नेका दुःख, पीडालाई समेटेर प्रकाशित हुँदै आएको छ ।

४३औं वर्ष प्रवेशका अवसरमा प्रकाशित यस विशेषाङ्कमा ‘आर्थिक समृद्धिका लागि स्थानीयस्तरमै रोजगारी’ विषयलाई समेटेका छौं । मुलुक संघीय संरचनामा गएसंगै अहिले तीन तहको सरकार छ । तीनै तहक सरकारले जनताका आशा, अपेक्षा र चाहानालाई सामयिक रुपमा बुझ्न नसक्दा अहिले मुलुक युवाबिहिन बन्ने अवस्थामा पुगेको छ । युवाहरु आफ्नो थाँतथलो छाडेर रोजगारीको खोजीमा भौतारिने क्रम दिनप्रतिदिन बढ्दो छ । यो अवस्था किन आयो ? यसको खोजी गरी समयमै निकासमा पुग्नु आजको आवश्यकता हो । यस अंकमा विशेषगरी स्थानीय सरकारले स्थानीयस्तरमै रोजगारीको वातावरण सृजना गर्न, बाँझिदै गएका उर्वर भूमिलाई पुनः हरभर बनाउन, युवालाई आफ्नै थाँतथलोमा स्वरोजगार बनाउन के-कस्ता नीति, कार्यक्रम अवलम्बन गरेका छन् र ती कार्यक्रममा युवालाई कसरी जोडिदै छ भन्ने विषयलाई प्राथमिकता दिएका छौं ।

हामीले मुलुकको वर्तमान अवस्थालाई मध्यनजर गर्दै संघीय लोकतान्त्रिक पद्धतिको जनहित प्रणाली स्थायीत्वप्रति जनताले उपभोग गर्न पाउनुपर्छ जस्ता विविध विषय उजागर गर्दै आएका छौं र निरन्तरता दिनेनै छौं । आम जनताका आवाजलाई अझै मुखरित गर्न प्रतिवद्ध छौं । प्रविधिको बढ्दो प्रयोगलाई ध्यानमा राखि न्यू मिडिया अन्तर्गत वेवसाइट, सामाजिक सञ्जालहरुमा फेसबुक पेज, ट्वीटर, युटुव च्यानल मार्फत पनि पाठकहरुलाई छिटो छरितो रुपमा विश्वासिला समाचार तथा सूचना प्रवाह गर्दै आएका छौं । हाम्रो ४३औं वर्ष प्रवेशको सन्दर्भमा यस विषेशाङ्कालाई लेख, रचना, शुभकामना, विज्ञापन, सूचना उपलब्ध गराउनु हुने लेखक, पाठक, विज्ञापनदाता, विभिन्न संघ संस्था सबै प्रति हार्दिक आभार व्यक्त गर्दछौं ।

हरेक बर्ष पुरानो हुँदै जाने तर स्मरण योग्य हुनाले प्रत्येक नयाँ वर्ष जन्मिन्छ । भञ्ज्याङ दैनिकको यो विषेशाङ्क पनि आशा र समिक्षाका लागि पाठक माझ सुम्पिएका छौं । विगतमा जस्तै आगामि दिनमा पनि पाठक, विज्ञापनदाता, सकारात्मक आलोचक, शुभचिन्तकहरुको साथ र सहयोगको अपेक्षा गरेका छौं । नयाँ वर्ष २०८१ ले सबैमा सुख, शान्ति, सु-स्वास्थ्य, समृद्धि प्रदान गरोस्, मुलुकलाई समृद्धिको बाटो तर्फ उन्मुख गराउन सबै क्षेत्रबाट सकरात्मक पहल होस् । हाम्रो पनि शुभकामना ।

सेयर गर्नुहोस्

प्रतिक्रिया दिनुहोस्

सम्बन्धित खवर