पृथ्वीराजमार्ग अन्तर्गत मुग्लिन-पोखरा सडकको पश्चिम खण्डमा प्रिकाष्ट प्रविधिको पुल राखिदै
पृथ्वीराजमार्गको आँवुखैरेनी-पोखरा खण्ड अहिले स्तरोन्नती कार्य भइरहेको छ । दुइ खण्डमा विभाजन गरी काम भइरहेको यस राजमार्गको पश्चिम खण्ड (जामुने-पोखरा)मा निर्माण गरिने चार वटा पुलमा प्रिकाष्ट प्रविधिबाट पुल राखिने भएको छ ।
सडक निर्माणमा लागिरहेको चिनियाँ ठेकेदार कम्पनी अनहुइ काइयुआन हाइवे एन्ड ब्रिज कम्पनीले यस खण्डको म्याग्दे, कोत्रे, कुम्लेखोला र विजयपुरमा पुल निर्माणका लागि प्रिकाष्ट प्रविधिको प्रयोग गर्न लागेको हो ।
निर्माण कम्पनीले विहीबार तनहुँको म्याग्दे खोला माथि प्रिकाष्ट प्रविधिबाट पुल राख्न सुरु गरेको चाइनिज कन्ट्याक्टरका इन्जिनियर अनुप श्रेष्ठले जानकारी दिए । उनका अनुसार निर्माण कार्यलाई तीव्रताका साथ अघि बढाइको र हालसम्म २३ प्रतिशत काम भएको छ ।
निर्माण कार्यमा कतिपय ठाउँमा खानेपानी संस्थानका पाइप, विद्युतका पोलहरू आदिका कारणले समस्या पारेको उनले बताए । इन्जिनियर श्रैष्ठले भने, ‘कोभिडका कारण निर्माण कार्य छ महिना प्रभावित भएका कारण नेपाल सरकारले उक्त समयावधि थप्ने र त्यस बाहेक थप पाँच छ महिना भित्रमा सम्पूर्ण निर्माण कार्य सम्पन्न गर्ने गरी कामलाई तीब्रता दिइएको छ ।’
जामुने-पोखरा खण्डमा सर्वसाधारणको आवागमनलाई समेत दृष्टिगत गर्दै बन्न लागेको चार तथा छ लेनको बाटाको आधा भागको निर्माण सन् २०२४ को अन्त्यसम्ममा पूरा गरिने उनले बताए । सडक निर्माण कार्य सन् २०२५ को मध्यदेखि अन्त्य सम्ममा सम्पन्न हुने उनले जानकारी गराए।
यस्तै, पोखरा महानगरपालिकाका प्रमुख धनराज आचार्यले विहीबार निर्माणाधीन मुग्लिन-पोखरा सडक खण्डको स्थलगत अनुगमन गरेका छन् । सञ्चारकर्मी सहित महानगर प्रमुख आचार्यले चिनिया निर्माण कम्पनीका प्रतिनिधिसँग निर्माणाधीन सडकको अवस्थाका साथै आजदेखि प्रिकाष्ट प्रविधि मार्फत म्याग्दे खोलामा राख्न लागिएको पुल लगायतका विषयमा जानकारी लिइएका थिए ।
पर्यटकसँगै आम सर्वसाधारणलाई आवतजावत सहज बनाउन यथासक्य चाँडो सडक निर्माण गर्नुपर्ने अवस्थाका सम्बन्धमा सम्बद्ध निर्माण कम्पनी एवं सरोकारवाला निकायसँग निरन्तर छलफल गरिरहेको उनले बताए ।
