पृथ्वीराजमार्गको जामुने-पोखरा खण्डमा दिनरातै काम
पृथ्वीराजमार्गको मुग्लिन पोखरा सडक विस्तार आयोजना अन्तर्गत तनहुँको जामुनेदेखि पोखरासम्मको पश्चिम खण्ड विस्तारलाई तीव्र बनाउन दिनरातै कामदार खटाइएको आयोजनाले जनाएको छ। दिनमा करिब सय जना र रातको समयमा करिब ५० जना कामदार खटाएर सडक निर्माण कार्यलाई तीव्र पारिएको चिनियाँ ठेकेदार कम्पनी ‘एनहुइ केयुनन हाइवे एण्ड ब्रिज’का इञ्जिनीयर अनुप श्रेष्ठले जानकारी दिए । उनले भने, ‘दिनरात र बिदाको समयमा पनि आफूहरू खटिएकोले हाल २३ प्रतिशत भन्दा धेरै प्रगति हासिल गरेको छ।’ पश्चिम खण्डमा नौ दशमलव दुइ किलोमिटर सडक पक्की निर्माण गरिएको इञ्जिनीयर श्रेष्ठले बताए।
ठेकेदार कम्पनीले पनि उक्त आयोजनालाई प्रतिष्ठाको विषय बनाएकोले करिब एक सय जना चिनियाँ प्राविधिकसहित सडक विस्तार तीव्र पारिएको चिनियाँ कम्पनीका साइड इञ्जिनीयर छन्ज लोनले बताएका छन् । ‘सडक विस्तारलाई तीव्र पार्न एक सय जना त चिनियाँ प्राविधिक नै खटिएका छन्’, इञ्जिनीयर छन्ज लोनले भने, ‘यो सडक विस्तारलाई प्रभावकारी तवरले कसरी सम्पन्न गर्न सकिन्छ भन्नेमा हामी जुटिरहेका छौं । आफूहरूले दिनरात गरी सडक विस्तारलाई अघि बढाएकाले २३ प्रतिशतले प्रगति भएको छ ।’
गण्डकी प्रदेशको राजधानी पोखरालाई संघीय राजधानी काठमाडौँसँग जोड्ने प्रमुख सडक स्तरोन्नतिमा सबैको चासो रहँदै आए पनि लक्ष्यअनुरुप काम हुन नसक्दा आलोचना भएको थियो ।
जामुनेदेखि पोखरासम्म ३८ दशमलव ८८ किलोमिटर दूरीको यस खण्डमा चार वटा ठूलो र आठ वटा सानो गरी १२ वटा पुलसमेत धमाधम निर्माण भइरहेको आयोजना पश्चिम खण्डले जनाएको छ । पश्चिम खण्ड अन्तर्गत पोखरा र दुलेगौँडासहित मुख्य बजार क्षेत्रमा करिब बीस किलोमिटर खण्डमा छ लेन रहने गरी ४६ मिटर फराकिलो र जामुनेदेखि कुम्ले खोलासम्म १८ मिटर र बाँकी सडक खण्ड २३ मिटर फराकिलो कायम रहने गरी कालोपत्र गरिने आयोजना प्रमुख राजेश पौडेलले जानकारी दिए । सात अर्ब ४० करोड ४६ लाख ८१ हजार रुपैयाँमा २०७८ जेठ ३ गते ठेक्का सम्झौता भएको छ।
यस्तै, जामुनेदेखि आँबुखैरेनीसम्मको ४२ किलोमिटर सडक खण्डको प्रगति भने ५६ प्रतिशत भन्दा धेरै रहेको पूर्वी खण्डका प्रमुख श्यामकुमार यादवले जानकारी दिए। यस खण्डको २०७८ वैशाख २ गते सम्झौता भई २०८१ वैशाख २ गते म्याद सकिए पनि ठेकेदार कम्पनीले कामलाई तीव्र पारेको यादवले बताए ।
यस खण्डको म्याद सकिए पनि दिन र रातको समयमा पनि काम गरी सडक विस्तार तीव्र पारिएको यादवले बताए । यस खण्ड विस्तारको ठेक्का चिनियाँ कम्पनी चाइना कम्युनिकेसन कन्स्ट्रक्सन कम्पनीले ६ अर्ब २१ करोड रुपैयाँमा जिम्मा लिएको छ। एसियाली विकास बैंक (एडिबी)को सहुलियत ऋण सहयोगमा मुग्लिन पोखरा सडक विस्तार कार्य अगाडि बढाइएको छ ।
