अनलाइनबाट सेवा प्रवाह गर्न वडा सचिव र कर्मचारीलाई तालिम
दुलेगौंडा : स्थानीय सरकारबाट उपलब्ध सेवालाई सहज र प्रविधिमैत्री बनाउने तयारी भइरहेको छ। तनहुँका दशवटै पालिकाले अब अनलाइन बाटनै नेपाली नागरिकताको सिफारिस दिन मिल्ने गरी आवश्यक तयारी थालेका छन् ।
जिल्ला प्रशासन कार्यालय तनहुँले आगामी १६ गतेबाट अनलाइनबाट प्राप्त भएका सिफारिस मात्र स्वीकार गर्ने भएपछि जिल्लाका सबै स्थानीय तहमा कार्यरत वडा सचिव र सहायक कर्मचारीलाई तालिम प्रदान गरिएको छ ।
शुक्लागण्डकी नगरपालिकाले मातहतका वडाका सचिव र सहायक कर्मचारीलाई बुधबार अनलाइन मार्फत सिफारिस प्रदान गर्न आवश्यक तालिम प्रदान गरेको छ ।
जिल्ला प्रशासन कार्यालय तनहुँका कम्प्युटर अपरेटर शंकर थापाले सहजिकरण गरेका तालिममा शुक्लागण्डकी नगरपालिकाका प्रमुख प्रशासकीय अधिकृत रामचन्द्र लामगादेले सरकारले दिने सेवा अब प्रविधिमैत्री बन्नुपर्ने बताए ।
लामगादेले भने, ‘जिप्रकाको यो निर्णयबाट सेवाग्राहीले सरल, सहज र त्रुटिरहित सेवा पाउन मद्दत पुग्ने छ । नागरिकता मा दोहोरोपनको समस्या समाधानमा पनि मद्दत पुग्ने र प्रविधिमैत्री सेवाले दीर्घकालिन सुविधा प्रदान गर्नेछ ।’
तालिममा जिल्ला प्रशासन कार्यालय तनहुँका अधिकृत बिकास श्रेष्ठले कार्यालयको सेवालाई सेवाग्राही मैत्री र समयसापेक्ष बनाउने प्रयास थालेको बताए । उनले प्रविधिमैत्री सेवा विस्तारले भबिष्यमा प्रमाण सुरक्षित गर्न सहयोग पुग्ने दाबी गरे ।
