लकडाउनको सदुपयोग गर्दै दुर्गा मन्दिर पुनःनिर्माण
भञ्ज्याङ समाचारदाता दुलेगौंडा
नेपालीहरुको ठुला पर्व दशै तिहार नजिकिदै छ । कोरोना भाइरसका कारण अघिल्लो बर्षहरुमा झै रौनकता छैन । तर पनि ठाँउ-ठाँउका दुर्गा तथा कालिकादेवीको मन्दिर सरसफाई र मर्मत संभारमा स्थानीयहरु जुट्न थालेका छन् ।
यसैबीच शुक्लागण्डकी-८, लालिममा रहेको दुर्गा मन्दिर पुनःनिर्माणमा त्यहाँका स्थानीयहरु पनि जुटेका छन् । लकडाउनको सदुपयोग गर्दै स्थानीय मन्दिरको पुनःनिर्माणमा जुटेका हुन् । वि.सं २०४६ सालमा निर्माण गरिएको मन्दिर जीर्ण भएकाले पुनःनिर्माण शुरु गरिएको मन्दिर पुनःनिर्माण समितिका अध्यक्ष विरेन्द्र कुमार सोम पौडेलले जानकारी दिए ।
उनका अनुसार गत बैशाखबाट पुनःनिर्माण कार्य थालिएको हो । बन्दाबन्दपछि पेसेवारहरु फुर्सदिलो भएकाले सबैको सहकार्यमा मन्दिर पुनःनिर्माणमा लाग्ने निर्णय भएअनुसार काम थालिएको पौडेलले बताए । हालसम्म मन्दिरको करिब ९० प्रतिशत काम सम्पन्न भएको छ ।
ढोर क्षेत्रका स्थानीयहरुको आस्थाको धरोहरको रुपमा रहेको दुर्गा मन्दिर पुनःनिर्माणमा स्थानीयहरु कसिएका हुन् । मन्दिर पुनःनिर्माणमा समितिलाई स्थानीय सरकारको पनि साथ मिलेको छ। शुक्लागण्डकी नगरपालिकाबाट ३ लाख र ८ नं वडा कार्यालयबाट १ लाख बजेट विनियोजन भएको छ । आवश्यक बाँकी रकम स्थानीय तथा देशविदेशमा रहेकाहरुबाट संकलन गरिएको अध्यक्ष पौडेलले बताए । ‘अहिलेसम्म करिब १५ लाख रुपैयाँ खर्च भइसकेको छ, आगामी घटस्थापनामा उद्घाटन गर्ने गरी काम भइरहेको छ’, उनले भने ‘२० लाखमा मन्दिर पुनःनिर्माण कार्य सम्पन्न गर्ने लक्ष्य लिएका छौँ । मन्दिर पाँच तले बनाइएको छ ।’ कोरोना प्रभावका कारण अपेक्षाकृत रकम संकलन हुन नसकेको हुँदा निर्माणधिन मन्दिर सम्पन्न गर्न आर्थिक संकट देखिन थालेकाले सहयोग गर्न चाहानेले खुलेर सहयोग गर्न सक्ने पौडेले बताए ।
बन्दै गरेको मन्दिरमा पुरातात्विक बस्तु तथा कलाहरु झल्काइएको छ । भक्तपुरे इट्टा प्रयोग गरिएको छ, कलात्मक आँखी झयाल र ढोका हालिएको अध्यक्ष पौडेलले बताए । मन्दिर निर्माणमा एक मिस्त्रीसंग निर्माण समितिका चार जना सदस्यले शुरुदेखि नै श्रमदान गर्दै आएका छन् । त्यस्तै ढोरबाराही युवा क्लबका पदाधिकारीहरुले पनि मन्दिरमा श्रमदान गरेका छन् । अब मन्दिरमा रंगरोगन गर्न, गजुर, घण्टी र मुर्ति राख्न बाँकी रहेको स्थानीय युवा सुरोज पौडेलले जानकारी दिए ।
