व्यास नगरपालिकामा न्यायीक समितिद्वारा २० उजुरी फर्छ्यौट

तनहुँको व्यास नगरपालिकामा एक वर्षमा २० उजुरी फर्छ्यौट भएका छन् । गत आर्थिक वर्ष २०७९/०८० मा दर्ता हुन आएको ५४ उजुरीमध्ये अधिकांश मेलमिलापबाट समाधान गरिएको उपप्रमुख एवं न्यायिक समिति संयोजक इन्दिरा दरैले बताइन् ।

दर्ता भएका उजुरी मध्ये १३ वटा मिलापत्रबाट फर्छ्यौट भएका छन् । ७ वटा उजुरी सर्वसम्मत ढङ्गबाट फर्छ्यौट गरिएका छन् । नगरपालिकाको न्यायिक समितिमा ३८ वटा उजुरी प्रक्रियामा रहेको संयोजक दरैले बताइन् ।

आ.व. २०७९/०८० मा अघिल्लो वर्षको १० वटा उजुरी सारिएका थिए । पालिकामा सबैभन्दा धेरै जग्गा विवादका उजुरी रहेको नगरपालिका न्यायिक समितिको सचिवालयले जनाएको छ । जग्गाको साँध सिमाना मिचेको, भोग चलन गरेको जग्गाबाट हटाउन खोजेको, एकको नाममा रहेको जग्गा अर्कैले भोग चलन गरेको, पति पत्नीबीचको विवाद, घरेलु हिंसा लगायतका विषयमा उजुरी दर्ता हुने गरेका छन् ।

नगरपालिकाले वडाबाटै मेलमिलाप गराउन हरेक वडामा मेलमिलाप केन्द्र पनि बनाएको छ । वडाले फर्छ्यौट गर्न नसकेको उजुरी नगरपालिकामा आउने गरेको उपप्रमुख दरैले बताइन् । उनले भनिन्, ‘वडातहबाटै हामीले मुद्दालाई मिलापत्र गर्न लगाउछौं, वडामा रहेको मेलमिलापले नसकेपछि न्यायीक समितिमा दर्ता गराइ उजुरीको छिनोफानो गराइन्छ ।’

‘३ देखि ५ पटकसम्म एउटै उजुरीमा छलफल गराउँदा उजुरीको छिनोफानोमा समय लाग्ने गरेको छ । हामीले मिलापत्रबाटै उजुरीको छिनोफानो गराउनेमा जोड दिने गरेका छौं’, उनले बताइन ।

चालु वर्ष २०८०/८१ मा ३ वटा मुद्दा दर्ता भएका छन् । जसमा चालु वर्ष र अघिल्लो वर्षको १/१ मुद्दाको फर्छ्यौट भएका छन् भने दुइ वटा उजुरी प्रक्रियामा रहेका छन् । स्थानीय सरकार सञ्चालन ऐन, २०७४ को दफा ४९ (२) अनुसार पेस भएको विवादको निवेदनको कारबाही र किनारा गर्दा सम्भव भएसम्म मेलमिलाप गर्न प्रोत्साहित हुने गरी दुवै पक्षको सहमतिमा मिलापत्र गराउने गरिएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर