क्रिश्चियन धर्मावलम्बीको समाधीस्थल व्यवस्थापनका लागि व्यासमा समिति गठन
भञ्ज्याङ न्यूज
तनहुँको व्यास नगरपालिकाले नगर क्षेत्र भित्रका क्रिश्चियन धर्मावलम्बीहरुको समाधी स्थल व्यवस्थापनका लागि समिति गठन गरेको छ । नगरप्रमुख बैकुण्ठ न्यौपानेको अध्यक्षतामा शुक्रबा बसेको नगरकार्यपालिका बैठकले वडा नं. ५ का अध्यक्ष मोहन कुमार श्रेष्ठको अध्यक्षतामा संयोजन तथा व्यवस्थापन समिति गठन गर्ने निर्णय गरिएको हो ।
कार्यपालिका बैठकले व्यास नगर कोभिड अस्पताल-संचालन कार्यविधि, २०७८ र एम्बुलेन्स संचालन कार्यविधि, २०७८ मा संशोधन प्रस्ताव पारित गरेको छ। बैठकले नगरपालिका अन्तर्गतका टोल संस्थाहरु, उपभोक्ता समितिका पदाधिकारीहरुलाई-योजना निर्माण र कार्यान्वयन सम्बन्धमा वडासंग समन्वय गरी प्रशिक्षण दिन पूर्वाधार विकास शाखालाई निर्देशन दिने निर्णय गरेको छ ।
यस्तै, सार्वजनिक निजी साझेदारीको उदाहरणीय योजना सञ्चालनका लागि मानुङकोट, नारेश्वर ताल लगायतका पर्यटकीय प्रवर्द्धनका योजनाहरुलाई अगाडि बढाउन कार्यालयलाई निर्देशन दिने निर्णय बैठकले गरेको छ ।
वि.सं. २०७८ को वडादशैं, शुभ-दिपावली, छठ पर्व, नेपाल सम्वत, इद लगायतका पर्वका अवसरमा शुभकामना व्यक्त गरेको नगर कार्यपालिका बैठकले कोभिड-१९ को असर अझै बाँकी भएकाले उल्लेखित चार्डपर्वहरुलाई र्सतर्कतापूर्वक मनाउन समेत अनुरोध गरेको छ ।
