तनहुँ प्रहरीद्वारा २६ जना फरार प्रतिवादी पक्राउ
- भञ्ज्याङ समाचारदाता (दमौली)
जिल्ला प्रहरी कार्यालय तनहुँले विभिन्न अपराध एवं मुद्दाहरुमा संलग्न रही फरार रहेका तथा अदालतबाट फैसला भई दण्ड, जरिवाना, दसौदी, कोर्ट फि र सरकारी बिगो समेत तिर्न बाँकी रहेका २६ जनालाई पक्राउ गरेको छ । फरार प्रतिवादीहरु पक्राउ गर्ने अभियाननै चलाएको तनहुँ प्रहरीले बैकिङ कसुर मुद्दामा फरार रहेका म्याग्दे गाउँपालिका-३ बस्ने बर्ष ३१ को अमृत भट्टराइ उपर उच्च अदालत पाटनको २०७६ चैत्र २ गतेको फैसलाले ७ दिन कैद र ६ लाख ६७ हजार जरिवाना हुने गरी फैसला भएकोमा तोकिएको कैद तथा जरिवाना भुक्तान नगरी फरार रहेको भन्दै पक्राउ गरेको छ ।
साधारण चोरी मुद्दामा फरार शुक्लागण्डकी-३ बस्ने सन्तोष खंग र शुक्लागण्डकी-९ बस्ने माइकल भन्ने सन्तोष गौतम उपर तनहुँ जिल्ला अदालतबाट २०७६ असार ८ गतेको फैसलाले खंग उपर २ बर्ष २ दिन कैद, २२ हजार ५०० रुपैयाँ जरिवाना र माइकल भन्ने सन्तोष गौतम उपर २ बर्ष २ महिना ४ दिन कैद र २२ हजार ५०० रुपैयाँ जरिवाना ठहर भएकोमा उक्त फैसला पश्चात तोकिएको कैद र जरिवाना भुक्तान नगरी फरार रहेका दुबै जनालाई प्रहरीले पक्राउ गरेको तनहुँका प्रहरी नायव उपरीक्षक युवराज तिमिल्सिनाले जानकारी गराएका छन् ।
यस्तै, जारी मुद्दामा तनहुँ जिल्ला अदालतको २०७१ मंसिर ७ गतेको फैसलाले जनही १/१ महिना कैद र १ हजार रुपैयाँ जरिवाना हुने गरी फैसला भए पश्चात फरार रहेका भानु-६ बस्ने बिमल थापा मगर र निजको श्रीमती सञ्जु थापा मगर लागु औषध मुद्दामा फरार १ जना, गाली बेइज्यती मुद्दामा फरार २ जना, जारी मुद्दामा फरार १ जना, नाता कायम मुद्दामा फरार १ जना, करकाप मुद्दामा फरार ८ जना, लिखत वेइज्यती मुद्दामा फरार ६, सम्बन्ध बिच्छेद मुद्दामा फरार १, जारी मुद्दामा फरार व्यक्ती १ जना गरी जम्मा २६ जना व्यक्तिहरुलाई जिल्ला प्रहरी कार्यालय तनहुँ तथा मातहत प्रहरी इकाई कार्यालयहरुबाट आइतबार पक्राउ गरिएको प्रहरी नायव उपरीक्षक तिमिल्सिनाले बताए । पक्राउ परेकाहरुबाट ४ बर्ष४ महिना १३ दिन कैद र जम्मा ७ लाख १६ हजार ६२० रुपैयाँ जरिवाना भुक्तानको लागि तनहुँ जिल्ला अदालतमा उपस्थित गराइएको बताइएको छ ।
