बन्दीपुर गाउँपालिकाद्वारा उत्कृष्ट शिक्षक र विद्यार्थी सम्मानित
बन्दीपुर : तनहुँको बन्दीपुर गाउँपालिकाले उत्कृष्ट शिक्षक तथा विद्यार्थीलाई सम्मान गरेको गाउँपालिकाले आइतबार बन्दीपुरमा एक कार्यक्रमको आयोजना गरी उत्कृष्ट शिक्षक तथा विद्यार्थीलाई सम्मान एवं पुरस्कृत गरेको हो ।
गाउँपालिकाले विद्यार्थीहरूको प्रतिभा पहिचान कार्यक्रम आयोजना गरी पुरस्कार प्रदान गरेको छ । गाउँपालिकाले एसईई परीक्षाका उत्कृष्ट विद्यालय, विद्यार्थी र शिक्षकहरूलाई नगद, ट्रफी र प्रमाणपत्रसहित सम्मान गरेको छ । प्रतिभा पहिचान कार्यक्रम अन्तर्गत नृत्य प्रस्तुत गरेका १० वटा विद्यालय मध्ये विद्यालयतर्फ प्रथम पुरस्कार नगद रु. २० हजार, ट्रफी र प्रमाणपत्रसहित पवित्र माध्यमिक विद्यालयले प्राप्त गरेको छ ।
त्यस्तै, द्वितीय पुरस्कार स्वरूप रु. १७ हजार, ट्रफी र प्रमाणपत्रसहित मनास्लु बोर्डिङ स्कुल हुन सफल भएको छ । तृतीय पुरस्कारको रूपमा नगद रु. १३ हजार, ट्रफी र प्रमाणपत्रसहित भानु माध्यमिक विद्यालयलाई र सान्त्वना पुरस्कारका रूपमा नगद रु. ५ हजार र प्रमाणपत्रसहित कालिका माध्यमिक विद्यालयलाई प्रदान गरिएको छ ।
कार्यक्रममा आधारभूत तह (कक्षा ८) अन्तर्गत सञ्चालन गरिएको परीक्षामा सामुदायिक विद्यालयतर्फ गाउँपालिका प्रथम कालिका माध्यमिक विद्यालयका सन्देश थापा र सामुदायिक विद्यालयको छात्रातर्फ प्रथम अरुण माध्यमिक विद्यालयकी इन्दु गुरुङ घोषित भएका छन् ।
यस्तै, माध्यमिक शिक्षा परीक्षा (एसईई) अनुसार आठ जना विद्यार्थीहरूलाई सम्मान गरिएको छ । तीमध्ये पवित्र माध्यमिक विद्यालयकी आयुषा श्रेष्ठ, ईसा नैनाबस्ती, लोकेश गुरुङ, मनिला लामा, रेजिना थापा, सभ्यता बिक, भानु माध्यमिक विद्यालयकी सलिना गुरुङ र विष्णु माध्यमिक विद्यालयका दिलिप भण्डारी क्षेत्री रहेका छन् ।
विषयगत उत्कृष्ट शिक्षकहरूको सम्मान पनि गरिएको छ । आधारभूत तह र माध्यमिक तह गरी जम्मा १७ जना शिक्षकहरूलाई नगद पुरस्कार र प्रमाणपत्रसहित सम्मान गरिएको हो । आधारभूत तह (कक्षा ८ सम्म) अन्तर्गत नेपाली विषयमा सेतीगंगा आधारभूत विद्यालयकी दमयन्ती बोहरा, अरुण माध्यमिक विद्यालयका लालु गुरुङ, चन्द्रोदय आधारभूत विद्यालयकी सबिना पण्डित र जगदीश्वर आधारभूत विद्यालयका रामविलास पोख्रेल सम्मानित भएका छन् ।
अंग्रेजी विषयमा सेतीगंगा आधारभूत विद्यालयका युवराज सेन ठकुरी र अरुण माध्यमिक विद्यालयका रेशम थापा, गणितमा सेतीगंगा आधारभूत विद्यालयका सरोज यादव, विज्ञानमा सेतीगंगा आधारभूत विद्यालयका पवनकुमार श्रेष्ठ, अरुण माध्यमिक विद्यालयका रामकुमार श्रेष्ठ, कालिका माध्यमिक विद्यालयकी प्रतिमा अधिकारी र सामाजिक विषयमा कालिका माध्यमिक विद्यालयका वीरेन्द्र केसीले पुरस्कृत भएका छन् ।
माध्यमिक तह (एसईई स्तर) अन्तर्गत नेपाली विषयमा अरुण माध्यमिक विद्यालयका लालु गुरुङ र कालिका माध्यमिक विद्यालयकी प्रमिला गुरुङ, सामाजिक विषयमा कालिका माध्यमिक विद्यालयका भोलानाथ भट्टराई, शिक्षा विषयमा विष्णु माध्यमिक विद्यालयका बाबुराम रानाभाट र कालिका माध्यमिक विद्यालयका मानबहादुर ओली, तथा गणित विषयमा पवित्र माध्यमिक विद्यालयका विजय आचार्य सम्मानित भएका छन् ।
कार्यक्रममा गाउँपालिका अध्यक्ष सुरेन्द्र बहादुर थापा उपाध्यक्ष पञ्चमाया गुरुङ, वडा नं. ३ का वडाध्यक्ष परमेश्वर भट्टराई लगायत शैक्षिक क्षेत्रको विकासका लागि सबैले आ–आफ्नो क्षेत्रबाट हातेमालो गर्न आवश्यक रहेको चर्चा गरेका थिए । कार्यक्रममा गाउँपालिकाका शिक्षा, युवा तथा खेलकुद शाखा प्रमुख भीम लामिछानेले कार्यक्रमको सहजिकरण गरेका थिए ।
