म्याग्दे गाउँपालिकाको सभाहल शिलान्यास
- भञ्ज्याङ समाचारदाता (म्याग्दे)
तनहुँको म्याग्दे गाउँपालिका सभाहलको निर्माण अगाडि बढाएको छ । जिल्ला समन्वय समिति तनहुँका प्रमुख शान्तिरमण वाग्लेले सोमबार हलको शिलान्यास गर्दै गाउँपालिकाको प्रशासनिक भवन लगत्तै गाउँ सभाहलको शिलान्यास हुनुले गाउँपालिकालाई स्थायित्व दिएको बताए ।
गाउँ कार्यपालिकाका सबै टिमले एक ढिक्का भइ नीति तथा योजना तयार गरेको र विकासका काममा पार्टी भन्दा माथि उठेर लागेकाले नै म्याग्दे हरेक काममा अब्बल देखिएको प्रमुख वाग्लेले बताए । गाउँपालिकाकी अध्यक्ष मायादेवी रानाले शुरुवातमा कानुन बन्न ढिलाइ हुँदा काममा केही ढिलाइ भएको जस्तो देखिए पनि अहिले विकासले गति लिएको रविकासमा राजनीति नगरेको उनको भनाइ थियो ।
कार्यक्रममा गाउँपालिकाका उपाध्यक्ष बालकृष्ण घिमिरेले गाउँपालिकाले थुप्रै बिकास निर्माणका काम गरेको बताए । शिक्षाको क्षेत्रमा पूर्वाधार निर्माणदेखि बाटोघाटो फराकिलो, पिचसँगै खानेपानीका क्षेत्रमा पुरानो योजना मर्मत र नयाँ योजना सम्पन्न गर्ने काम गरिएको र ५ बर्ष भित्रमा सबैका घरघरमा खानेपानी धारा पुर्याइने नीतिगत निर्णय भएको बताएका थिए । गाउँपालिकाले करिब नौ करोड ४९ लाख रूपैयाँको लागतमा सभाहल बनाउने गरी डिपिआर तयार गरेको प्रमुख प्रशासकीय अधिकृत नारायणप्रसाद अधिकारीले जानकारी गराए ।
