मुग्लिङ–पोखरा सडक विस्तार सुरु : आँबुखैरेनी र बन्दीपुर गाउँपालिका खण्डमा रुख काट्न थालियो
भञ्ज्याङ न्यूज
गण्डकी प्रदेशको ‘लाइफलाइन’ मानिने पृथ्वी राजमार्ग अन्गर्तत मुग्लिङ–पोखरा सडक खण्ड विस्तार सुरु भएको छ । पहिलो चरणमा सडक सीमाभित्रका रूख काट्न थालिएको छ । जिल्लाको आँबुखैरेनी र बन्दीपुर गाउँपालिका खण्डमा रूख काट्न थालिएको हो ।
सडक विस्तार आयोजनाले हालसम्म १९७ वटा रूख काटेको आयोजनाका इन्जिनियर पुष्कर रेग्मीले बताए । सडक विभाग आयोजना निर्देशनालयले पहिलो चरणमा मुग्लिङ–पोखरा सडकको आँबुखैरेनी–पोखरा खण्ड निर्माण अघि बढाएको हो । सडक विस्तारका क्रममा राइट अफ वेमा पर्ने एक हजार एक सय मिटरसम्मका सानाठूला रूख काटिसकिएको उनको भनाइ छ ।
‘तिहारअगाडि बन्दीपुरभित्रका करिब एक सय मिटरसम्मका रूख हटाउने काम भयो, तिहारलगत्तै आँबुखैरेनी खण्डका रूख काट्न थालिएको छ ।’ रूख काटेर संकलन गर्न १२ कर्मचारी खटाइएको छ । पहिलो चरणमा रूख काटेर सडक डिभिजन कार्यालयलाई बुझाउने र अन्य प्रक्रिया पूरा गरी काटिएका रूख डिभिजन वन कार्यालयलाई हस्तान्तरण गरिने उनले जानकारी दिए ।
राष्ट्रिय राजमार्गको स्तरोन्नति र विस्तार कार्यक्रमअन्तर्गत साविक दुई लेनमा रहेको मुग्लिङ–पोखरा सडकखण्डलाई चार लेनमा विस्तार गर्ने क्रममा जिल्लाभित्रका ६ हजार ७ सय ५० रूख काटिने डिभिजन वन कार्यालयका सहायक प्रमुख अरुण पराजुलीले बताए । सडक विस्तारका क्रममा कास्की खण्डमा एक हजार २ सय ५० रूख काटिनेछ । खयर, सिसौ, कटुस, कटर, कपुर, चिलाउने, सिफललगायतका रूख काटिनेछन् । मुग्लिङ–पोखराको दूरी ८८ किमि छ ।
आँबुखैरेनी–पोखराको लम्बाइ ८० किमि छ । निर्देशनालयले आँबुखैरेनी–पोखरा सडकलाई दुई खण्डमा विभाजन गरेको छ । आँबुखैरेनी–जामुने (४१ किमि) पूर्वी खण्ड र जामुने–पोखरा (३९ किमि) पश्चिम खण्ड छन् । आँबुखैरेनीदेखि मुग्लिङ खण्डको आठ किलोमिटर दूरीको भने डिजाइन हुँदै छ । यस खण्डमा मर्स्याङ्दी जलविद्युत् गृह रहेकाले सडक फराकिलो बनाउन सकस हुने भएपछि सडकको रेखांकन नै परिवर्तन गर्नुपरेको आयोजनाले जनाएको छ ।
पश्चिम खण्ड निर्माणको जिम्मा चिनियाँ कम्पनी यनहुई काइयुन हाइवे एन्ड ब्रिज कन्स्ट्रक्सनले ७ अर्ब ४० करोड र पूर्वी खण्डको जिम्मा चीनकै कम्युनिकेसन कन्स्ट्रक्सन कम्पनीले ६ अर्ब २१ करोड ३१ लाख १३ हजार रुपैयाँमा पाएको छ । पृथ्वी राजमार्गको करिब ७२ किमि सडकखण्ड तनहुँ खण्डमा पर्छ । यसअन्तर्गत आँबुखैरेनी, विमलनगर, डुम्रे, छिर्कने, घाँसीकुवा, तालघारे, दमौली, चापाघाट, जामुने, थर्पु, खैरेनीटार, दुलेगौंडा, कोत्रेलगायत सानाठूला बजार क्षेत्र पर्छन् । यी बजारमध्ये बढी मात्रामा आँबुखैरेनी, विमलनगर, डुम्रे, छिर्कने, दमौलीलगायत बजार क्षेत्र प्रभावित हुनेछन् । अध्ययनअनुसार तनहुँका ६ सय घरटहरामा क्षति पुग्ने अनुमान छ ।
