राष्ट्रिय जनगणनाका लागि जिल्लामा कार्यालय स्थापना

राष्ट्रिय जनगणना २०७८ का लागि तनहुँमा जिल्ला जनगणना कार्यालय स्थापना गरिएसंगै कार्यालयले काम अगाडि बढाएको छ । राष्ट्रिय जनगणना २०७८ को तथ्याङ्क संकलनका लागि जिल्लामा करिब पाँच सय गणक र एक सय सुपरीवेक्षक परिचालन गर्ने गरी काम अगाडि बढाइएको छ । जिल्ला जनगणना कार्यालय तनहुँले विहीबार पत्रकार सम्मेलन गरी विसं २०७८ को जेठ र असार महीनामा हुने सो गणना नेपालको जनगणनाको इतिहासमा ११० वर्षमा गर्न लागिएको १२औं श्रृंखला भएको जनगणना अधिकारी नन्दलाल सापकोटाले जानकारी गराए ।

उनले स्थानीय तहका जनशक्तिलाई प्राथमिकता दिएर गणक र सुपरीवेक्षकलाई करारमा राख्ने गरी काम भइरहेको समेत बताए । ‘आगामी १० वर्षलाई नेतृत्व गर्ने भएकाले सही सूचना संकलनमा जोड दिइएको छ’, उनले भने, ‘समावेशी सहभागिताका लागि महिला र पुरुष दुवैलाई स्थान दिइएको छ । महिलाको हकमा ४५ वर्ष उमेर ननाघेको हुनुपर्ने व्यवस्था गरिएको छ ।’

पहिलो चरणमा सुपरीवेक्षकद्वारा प्रत्येक घर तथा घरपरिवारमा पुगेर घर तथा घरपरिवारको विवरण लिइन्छ । पुरुष, महिला र अन्य लिङ्गी तथा परिवारको कृषिसम्बन्धी विवरण संकलन गरिने छ । दोस्रो चरणमा गणकद्वारा प्रत्येक घरधुरीमा पुगेर मुख्य प्रश्नावलीमार्फत पारिवारिक विवरण तथा व्यक्तिको जन्म, मृत्यु बसाइँसराइ लगायत विवरण संकलन गर्ने भएको छ ।

यस्तै, दोस्रो चरण अन्तर्गत नै सबै स्थानीय तहका प्रत्येक वडा कार्यालयबाट वडास्तरीय सामुदायिक प्रश्नावलीमार्फत वडाको आधारभूत स्रोतसाधन, पहुँच, क्षमता पूर्वाधार र विपद् सम्बन्धी विवरण संकलन गरिनेछ । घर तथा घरपरिवार सूचीकरण फाराम ०७८ वैशाख २६ देखि जेठ १४ र मुख्य प्रश्नावली ०७८ जेठ २५ देखि असार ८ गतेसम्म विवरण भर्ने तयारी गरिएको छ ।

एक सुपरीवेक्षकले २० दिनको अवधिमा एक हजार घरपरिवारको सूचीकरण तयार गर्नुपर्ने छ । त्यस्तै एक सुपरीवेक्षकको मातहतमा रहेर चार गणकले काम गर्ने बताइएको छ । कार्यक्रममा प्रमुख जिल्ला अधिकारी सागर आचार्यले यस कार्यलाई सफल बनाउनका लागि सबै निकायबाट अनुगमन तथा खबरदारी गर्न आग्रह गरे ।

सेयर गर्नुहोस्

प्रतिक्रिया दिनुहोस्

सम्बन्धित खवर