बाढीपहिरोले विद्युतपोलमा क्षति, बन्दिपुरमा पाँचदिन पछि बत्ति बल्यो
भञ्ज्याङ न्यूज
असार १५ गतेदेखि परेको निरन्तर वर्षाका कारण विद्युत पोलमा क्षति पुग्दा जिल्लाका विभिन्न ठाउँमा विद्युत अवरुद्ध भएको छ । लगातारको वर्षाले पोल क्षति हुँदा जिल्लाका करिब आठ हजार घरधुरीमा विद्युत अवरुद्ध भएको नेपाल विद्युत प्राधिकरण वितरण केन्द्रले जनाएको छ । हालसम्म व्यास र भानु नगरपालिका, बन्दीपुर गाउँपालिकाका विभिन्न ठाउँमा विद्युत अवरुद्ध भएको वितरण केन्द्रका प्रमुख सोवितबहादुर क्षेत्रीले जानकारी दिए ।
उहाँका अनुसार २८ विजुलीको पोल पहिरोले क्षति पुगेको छ । व्यास-१० बोटेगाउँमा एक, व्यास-१२ देउराली, छिर्कने र जौबारीमा आठ, व्यास-१३ छाब्दीमा चार, भानु-१ साझबोटेमा पाँच, भानु-३ तुरतुरेमा तीन पोलमा क्षति पुगेको छ । त्यस्तै भानु-६ बरभञ्ज्याङमा दुइ, बन्दीपुर-२ भैसेखारमा चार, भानु-१३ पोखरीछापमा एक पोलमा क्षति पुगेको छ । ‘पहिरोले क्षति भएको पोलहरुको मर्मत कार्य भइरहेको छ’, उनले भने, ‘पूर्ण रुपमा सञ्चालन हुन अझै तीन/चार दिन लाग्नेछ।’
विद्युत पोलमा क्षति पुगेर विद्युत अवरुद्ध हुँदा दैनिक जीवनमा प्रत्यक्ष असर परेको बन्दिपुरका स्थानीयवासी बसन्त पौडेलले बताए । बन्दिपुर गाउँपालिकाका उपाध्यक्ष करुणा गुरुङले विद्युत अवरुद्ध हुँदा गाउँपालिकाको काम समेत प्रभावित भएको बताइन ।
यस्तै, बन्दिपुरमा पहिरोले क्षति पुर्याएको विद्युत पोल मर्मत सुधार गरी आइतबार साँझबाट बत्ति बलेको छ । बत्ति बलेसंगै इन्टरनेट लगायतका अन्य सेवा पनि सुचारु भएको बताइएको छ ।
