तनुहँको भानु-७ स्थित थानीमाई मन्दिरमा ५५ फूलका डोली भित्रियो

तनहुँको भानु नगरपालिका-७ स्थित थानीमाई मन्दिरमा मंगलबार ५५ फूलको डोली भित्रिएको छ । प्रत्येक वर्ष कात्तिक महिनाको मंगलबार थानीमाई मन्दिरमा देशका विभिन्न ठाउँबाट भक्तजनले फूलको डोली चढाउने गर्दछन् । कात्तिकको दोस्रो मंगलबार ५५ फूलको डोली भित्रिएको मन्दिपुर संरक्षण समितिले जनाएको छ । डोलीसँगै करिब पाँच हजार भक्तजनले मन्दिरमा पूजाअर्चना गरेको समितिका अध्यक्ष जीवन थापामगरले जानकारी गराए। सोमबार राति ७१ भक्तजनले जागराम बसी बत्ती समेत बालेका थिए ।

मन्दिरमा कात्तिकको पहिलो मंगलबार १८ फूलको डोली भित्र्याइएको थियो । विशेष गरी कात्तिक, मंसिर र माग महिनाको मंगलबार मन्दिरमा फूलको डोली चढाउन सर्वसाधारणको भीड लाग्छ । मन्दिरमा फूलको डोली चढाउँदा मनोकामना पूरा हुने धार्मिक विश्वास रहिआएको छ ।

सोमबार सत्यनारायणको पूजा गरी डोली तयार गर्ने र थानीमाई मन्दिरमा फूलको डोली चढाउने परम्परा छ । थानीमाई मन्दिरमा कात्तिकसँगै मंसिर र माघमा भक्तजनको भीड लाग्छ । मन्दिरमा फूलको डोली चढाउन छिमेकी जिल्ला गोरखा, लमजुङ, कास्की, चितवन, नवलपरासी, काठमाडौं लगायतबाट भक्तजन आउँछन् । मन्दिरमा साउन महिना, एकादशी र औँसी बाहेकका दिनमा पूजाअर्चना हुँदै आएको छ ।

पछिल्ला वर्षमा थानीमाई पुग्न सडक निर्माण गरिएको छ । सडक निर्माण भएसँगै भक्तजनको संख्या बढ्न थालेको थापाले बताए । भक्तजनले फूलको डोली र पञ्चैबाजासहित थानीमाई मन्दिरमा नाचगान गर्दै तीन पटक परिक्रमा गर्छन् । परिक्रमापछि थुम्कामा रहेको मन्दिर परिसरमा रहेका देवलहरूमा डोलीसँगै लगिएको तोरणलाई तीन फन्का घुमाएर बाँध्ने गरिन्छ । त्यसपछि मन्दिरभित्र प्रवेश गरी आफ्नो भाकल पूरा भएको भन्दै पूजा गरिन्छ ।

समुन्द्र सतहबाट एक हजार २०० मिटर उचाइमा अवस्थित यहाँबाट गोरखाको लक्ष्मी बजार, लिगलिग कोट, पालुङटार, राइनासकोट लगायत हिमश्रृंखलाका दृश्य देख्न सकिन्छ । विसं २०७२ वैशाख १२ गतेको भूकम्पबाट क्षति पुगेको सो मन्दिरको पुनःनिर्माण सम्पन्न भएको छ । संस्कृति, पर्यटन तथा नागरिक उड्डयन मन्त्रालयबाट प्राप्त रु १४ लाख र मन्दिरको भेटीबाट संकलित रु ६ लाखको लागतमा उक्त मन्दिर पुनःनिर्माण गरिएको छ । विसं १८२५ देखि सो मन्दिरमा पूजाअर्चना थालिएको स्थानीयवासी बताउँछन् ।

सेयर गर्नुहोस्

प्रतिक्रिया दिनुहोस्

सम्बन्धित खवर