नेता जोशीद्वारा तेस्रो चरणको १० दिने गृह जिल्ला भ्रमण अभियान
भञ्ज्याङ समाचारदाता/दमौली
पूर्व गृहमन्त्री तथा नेपाली काँग्रेसका नेता गोविन्दराज जोशीले तेस्रो चरणको १० दिने गृह जिल्ला भ्रमण अभियान चलाउने भएका छन् । नेता जोशीले पुस १८ देखि २७ गतेसम्मको जनता भेटघाट कार्यक्रम चलाउन लागेका हुन् । नेता जोशीले आँबुखैरेनी, कुमालटारी, कलेस्तीदोभान, क्यामिन, पुलिमर्याङ, मेवाबारी, नारायणचौर, टुटेपानी, देवघाट, कोटा, छिपछिपे, साराङघाट, घुमाउने, प्युघर, लगायतका स्थानका जनतासँग भेटघाट गर्ने कार्यक्रम तयार गरेका छन् ।
नेपाली काँग्रेस तनहुँका संस्थापक सचिव समेत रहेका नेता जोशीलाई वर्तमान पार्टी नेतृत्वले अन्यायपूर्ण ढंगले साधरण सदस्यता समेत नरहने गरी गरिएको कारबाहीमा तनहुँ काँँग्रेसका नेता तथा कार्यकर्ता रुष्ठ छन् । यसैसन्दर्भमा आगामी स्थानीय, प्रदेश तथा संघीय निर्वाचनलाई मध्यनजर गर्दै जनताको अभिमत बुझ्न नेता जोशीले दुइ चरणको अभियान सकिसकेका छन् । १९ वर्षदेखि सत्ता बाहिर रहनु भएका जोशी विकासवादी नेताको रुपमा जिल्लामा परिचित छन् । नेता जोशीले जिल्लाको शिक्षा, स्वास्थ्य, विद्युत्तिकरण, रोजगारी, सडक जस्ता क्षेत्रमा महत्वपूर्ण काम गरेका थिए ।
