शुक्लागण्डकीको १०औं नगरसभाबाट जलस्रोत ऐन र तीन कार्यविधी पारित
भञ्ज्याङ न्यूज
तनहुँको शुक्लागण्डकी नगरपालिकाको १०औं नगरसभाले जलस्रोत ऐन र तीन कार्यविधी पारित गरेको छ । नगरसभाले जलस्रोतको समुचित उपयोग र संरक्षण गर्नलाई नगरपालिकाले जलस्रोत ऐन २०७८ ल्याएको हो ।
संघीय सरकारबाट स्वीकृत जलस्रोत ऐन २०४९ को दफा क अनुसार नगरको विधायन समितिले बनाएको ऐन बिहीबारको कार्यपालिका बैठकले स्वीकृत गरेको छ । शुक्रबार भएको १०औं नगरसभाबाट जलस्रोत ऐन पारित भएको नगर प्रवक्ता खिमबहादुर कुमालले जानकारी गराए ।
समुदायमा स्वच्छ खानेपानीको व्यवस्था गराउन र खानेपानीमा हुने वातवरणीय तथा हानिकार प्रभाव रोक्दै जलस्रोतलाई प्रदुषणमुक्त बनाउन ऐन बनाईएको उनले बताए । १०औ नगरसभाले भवन निर्माण अनुमति प्रक्रियाको कार्यविधी २०७८, भवन अभिलेखीकरण सम्बन्धी कार्यविधी २०७८ र खानेपानी तथा सरसफाई उपभोक्ता समिति दर्ता तथा नविकरण व्यवस्थापन कार्यविधी २०७८ पारित गरेको छ ।
नगरसभाले १ करोड ४४ लाख ८९ हजार ९७९ रुपैयाँ बेरुजु पछ्र्यौट गरेको छ । आर्थिक बर्ष२०७६/७७ सम्म अन्तिम लेखा परिक्षणबाट औल्याईएको नियमित गर्नुपर्ने बेरुजु मध्य उपलब्ध प्रमाण र कागजातको आधारमा बेरुजु पछ्यौट गरिएको बताइएको छ । बाँकी बेरुजु पछ्र्यौट गर्नलाई बेरुजु पछ्र्यौट समिति तत्काल गठन गर्न सुझाव दिइएको छ ।
नगर प्रमुख किसान गुरुङले पाँच वर्षमा विकासको जग बसाल्न सफल भएको बताएका छन् । नगरसभालाई सम्बोधन गर्दै उनले जनप्रतिनिधि र कर्मचारीले जनतामाथि खेलवाड गर्न नहुने बताए । आफुहरुले पाँच बर्षमा गरेका कामको जनताले समिक्षा गर्ने उनको भनाई छ । शुक्लागण्डकी नगरपालिका-६ का वडा सदस्य बुद्धिबहादुर थापाले पाँच वर्षे कार्यकालमा गौरवका आयोजना भन्न मिल्ने काम खासै गर्न नसकेको बताएका थिए ।
