दमौली अस्पतालको अध्यक्षमा थापा नियुक्त
भञ्ज्याङ न्यूज
दमौली अस्पताल विकास समितिको अध्यक्षमा देवेन्द्र थापा नियुक्त भएका छन् । गण्डकी प्रदेशको स्वास्थ्य तथा जनसंख्या मन्त्रालयले चार महिनापछि दमौली अस्पताल व्यवस्थापन समितिमा अध्यक्ष नियुक्त गरेको हो । मन्त्रालयले जनता समाजवादी पार्टीका केन्द्रीय सदस्य थापालाई अस्पताल व्यवस्थापन समितिको अध्यक्षमा नियुक्त गरेको छ ।
गत असोज २२ गते प्रदीपराज अधिकारीको कार्यकाल सकिएपछि अस्पताल व्यवस्थापन समिति पदाधिकारीविहिन बनेको थियो । व्यवस्थापन समितिमा नियुक्त भएका अध्यक्ष र सदस्यलाई केही दिनमा पदस्थापन गरिने भएको छ ।
सदरमुकामस्थित अस्पतालमा अध्यक्ष नियुक्ति नहुँदा विविध निर्णय प्रभावित हुँदै आएको थियो । अध्यक्ष नियुक्ति ढिलाइले अस्पतालको प्रशासनिक कार्यमा समस्या हुँदै आएको अस्पतालले जनाउँदै आएको थियो । अध्यक्ष नियुक्ति नहुँदा आर्थिक निर्णयहरु रोकिएका र यसले गर्दा अस्पताल सञ्चालनमा समेत बाधा पुग्दै आएको अस्पतालका प्रमुख डा. सुनिल पौड्यालले बताए।
डा. पौड्यालका अनुसार समिति पदाधिकारीविहिन हुँदा अस्पतालमा कर्मचारी नियुक्ति पनि रोकिएका छन् । अस्पतालमा जनशक्ति कम भएको र नयाँ कर्मचारी नियुक्ति नहुँदा कार्यरत जनशक्तिले नै तोकिएभन्दा बढी समय काम गर्दै आएको बताइएको छ ।
