पृथ्वीराजमार्गको तनहुँ स्थित शेरामा दुइ बस ठोक्किदा १५ जना घाइते
भञ्ज्याङ न्यूज
पृथ्वीराजमार्ग अन्तर्गत तनहुँको शुक्लागण्डकी नगरपालिका-७ शेरामा आज दिउँसो सवारी दुर्घटना हुँदा १५ जना घाइते भएका छन् । दमौलीबाट खैरेनीटारतर्फजाँदै गरेको यात्रुवाहक बस र विपरित दिशाबाट आउँदै गरेको बस एकआपसमा ठोक्किदा दुवै बसमा सवार १५ जना घाइते भएको तनहुँ प्रहरीले जनाएको छ ।
दमौलीबाट खैरेनीटार जाँदै गरेको ग१ख ५९०० नम्बरको बस र खैरेनीटारबाट दमौली आउँदै गरेको बा५ख ५८१७ नम्बरको बस ठोक्किदा दुवै बसमा सवार १५ जना घाइते भएको प्रहरी नायब उपरिक्षक युवराज खड्काले बताए ।
घाइतेमध्ये तीन जनालाई दमौलीस्थित रत्नहरि अस्पताल, १० जनालाई जिपी कोइराला श्वासप्रश्वास उपचार केन्द्र र दुइ जनालाई थप उपचारका लागि पोखरा पठाइएको छ ।
घाइतेमध्ये व्यास नगरपालिका-६ बस्ने ३६ वर्षीय अजय श्रेष्ठ, ललितपुर गोदावरी नगरपालिका-१ बस्ने ६२ वर्षीय राजकेशर कार्की, ६० वर्षीया रुपा कार्कीको रत्नहरि अस्पतालमा उपचार भइरहेको छ ।
यस्तै काभ्रेचौरी गाउँपालिका-३ बस्ने ३३ वर्षीय नरबहादुर श्रेष्ठ, व्यास नगरपालिका-६ बस्ने २७ वर्षीय दुर्गाबहादुर दुरा, व्यास नगरपालिका-१२ बस्ने ७१ वर्षीया पार्वती बराल, स्याङ्जा अर्जुनचौपारी गाउँपालिका-४ बस्ने २७ वर्षीया देवी विक, सोही ठाउँका ६ वर्षीय आशिष विक, व्यास नगरपालिका-६ बस्ने २० वर्षीया शर्मिला सुनार, म्याग्दे गाउँपालिका-३ बस्ने ३० वर्षीया सङ्गतिा खड्का, व्यास नगरपालिका-६ बस्ने २५ वर्षीया हरिमाया आले, ३४ वर्षीया टंकमाया गुरुङ र भारत घर भई शुक्लागण्डकी नगरपालिका-५ बस्ने ३५ वर्षीया कृष्ण गुप्ताको जिपी कोइराला श्वासप्रश्वास उपचार केन्द्रमा उपचार भइरहेको छ ।
यसैगरी लमजुङ मध्यनेपाल नगरपालिका-५ बस्ने ५० वर्षीय लक्ष्मण रायमाझी र शुक्लागण्डकी नगरपालिका-४ बस्ने ३२ वर्षीय राज परियारको पोखरामा उपचार भइरहेको तनहुँ प्रहरीले जनाएको छ ।
