तनहुँमा निर्वाचन सामग्री वितरण सुरु

वैशाख ३० गते हुने स्थानीय तह निर्वाचनका लागि जिल्ला निर्वाचन कार्यालय तनहुँले सोमबारदेखि निर्वाचन सामग्री वितरण सुरु गरेको छ । कार्यालयले दश वटा पालिकाका २९७ मतदान केन्द्रमा खटिने मतदान अधिकृतलाई निर्वाचनका लागि आवश्यक पर्ने सामग्री वितरण सुरु गरेको हो । मुख्य निर्वाचन अधिकृतको कार्यालयबाट नियुक्ति पत्र बुझेर आएका कर्मचारीलाई सामग्री वितरण थालिएको कार्यालय प्रमुख हर्रि्रसाद ढकालले बताए ।

नियुक्ति पत्रलाई अनलाइन सफ्टवेयरमा प्रविष्ट गरेपछि आवश्यक सामग्री प्रदान गरिएको छ । ‘निर्वाचनका लागि कार्यालयबाट ६१ प्रकारका सामग्री वितरण गरिएको छ’, उनले भने, ‘मतपेटिका, परिचयपत्र, लाहाछाप, स्ट्याम्प लगायतका सामग्री निर्वाचन कार्यालयबाट र मतपत्र भने मुख्य निर्वाचन अधिकृतको कार्यालयबाट उपलब्ध गराइएको छ ।’

तनहुँका चार नगरपालिका, छ गाउँपालिकाका ८५ वटा वडाका ४४५ पदमा विभिन्न राजनीतिक दल, स्वतन्त्र गरी १ हजार ६३७ जना उम्मेदवार चुनावी मैदानमा उत्रिएका छन् । जिल्लामा १ लाख १७ हजार १३४ पुरुष र १ लाख २७ हजार २०६ महिला गरी २ लाख ४४ हजार ३४० जना मतदाता रहेको प्रमुख ढकालले बताए । तनहुँमा गत स्थानीय तह निर्वाचनमा भन्दा यसपटक ४९ हजार आठ सय ६९ बढी मतदाता थपिएका छन् ।

वि.सं. २०७४ सालको स्थानीय तह निर्वाचनमा जिल्लामा एक लाख ९४ हजार ४७१ मतदाता रहेका थिए । जिल्लाका मतदान केन्द्रमा मतदान अधिकृत, सहायक मतदान अधिकृत, सहायक, सहयोगी र अन्य गरी २ हजार ३७६ जनशक्ति परिचालन गरिने भएको छ । निर्वाचनका लागि २९७ मतदान अधिकृत, २९७ सहायक मतदान अधिकृत, ५९४ सहायक, २९७ सहयोगी परिचालन गरिने भएको छ । त्यसका साथै मतदान केन्द्रमा ८९१ कर्मचारी नियुक्त गरिएको छ ।

यस्तै, मतदान स्थलको सुरक्षा तथा मतदातालाई सुरक्षित, भयरहित वातावरणमा मतदान गर्ने वातावरण मिलाउन जिल्ला प्रहरी कार्यालयको नेतृत्वमा सुरक्षा व्यवस्था मिलाइएको प्रमुख जिल्ला अधिकारी विश्वप्रकाश अर्यालले बताए । मुख्य निर्वाचन अधिकृतको कार्यालयले सोमबारदेखि नै कर्मचारीलाई नियुक्तिपत्र समेत वितरण गरेको छ । निर्वाचनमा खटिने एक हजार ४८५ मध्ये ८९१ कर्मचारीलाई मुख्य निर्वाचन अधिकृतको कार्यालयबाट नियुक्ति र तलबभत्ता उपलब्ध गराइएको मुख्य निर्वाचन अधिकृत एवं जिल्ला न्यायाधीश हरिशचन्द्र ढुङ्गानाले जानकारी दिए ।

यस्तै, निर्वाचन कार्यालयले भौगोलिक दूरीले टाढा रहेका मतदान केन्द्रका कर्मचारीलाई सोमबार सामग्री उपलब्ध गराएको छ । कार्यालयका अनुसार सोमबार घिरिङ, ऋषिङ, देवघाट, बन्दिपुर, आँबुखैरेनी गाउँपालिका र भिमाद नगरपालिकाका मतदान केन्द्रमा खटिने कर्मचारीलाई सामग्री उपलब्ध गराएका छ । व्यास , भानु, शुक्लागण्डकी नगरपालिका र म्याग्दे गाउँपालिकालाई मंगलबार सामग्री प्रदान गर्ने भएको छ ।

निर्वाचन सामग्री बुझेपछि सुरक्षा निकायको निग्रानीमा कर्मचारीलाई सम्बन्धित मतदान केन्द्रसम्म लैजाने व्यवस्था मिलाइएको छ । मतदान केन्द्रमा खटिने सबै कर्मचारी वैशाख २७ गते बेलुकासम्म सम्बन्धित मतदान केन्द्रमा पुगिसक्नुपर्नेछ । मतदान केन्द्रमा पुगेपछि सम्बन्धित ठाउँका राजनीतिक दलसँग बैठक, मतदाता परिचयपत्र वितरण, मतदान केन्द्र निर्माण लगायतका काम गरिने छ ।

सेयर गर्नुहोस्

प्रतिक्रिया दिनुहोस्

सम्बन्धित खवर