व्यासका मेयर पदका उम्मेदवार न्यौपानेको अपिल

तनहुँको व्यास नगरपालिकामा नेपाली कांग्रेसका तर्फबाट उम्मेदवारहरु बनेकाहरु तर्फबाट मेयर पदका उम्मेदवार बैकुण्ठ न्यौपानले एक अपिल जारी गरेका छन् । वैशाख ३० गते हुन गइरहेको स्थानीय निर्वाचनमा नेपाली कांग्रसको तर्फबाट सेती र मादी नदीको पवित्र संगम तटमा अवस्थित महर्षि वेद व्यास र पराशरको तपोभूमी (कर्मक्षेत्र) रहेको व्यास नगरपालिकाको नयाँ नेतृत्वका लागि चुनावी मैदानमा रहेको अपिलमा भनिएको छ ।

आगामि पाँच वर्षमा गर्ने कार्यहरुको ८८ बुँदे प्रतिबद्धता पत्र सार्वजनिक गरेको व्यहोरा स्मरण गराउँदै प्रचार प्रसारको दौरानमा गाउँ र नगरले बनेको व्यास नगरपालिकाको हरेक स्थानमा पुग्दा आम नगरबासीले देखाउनुभएको उत्साहले हामीलाई ठुलो हौसला मिलेको बताइएको छ ।

अपिलमा भनिएको छ, ‘प्रजातन्त्रको स्थापना लगायत देशमा पटक पटक भएका आन्दोलनमा नेपाली कांग्रेसले तनहुँमा खेलेको भुमिका सबैका सामु छर्लङ्ग छ । द्वन्द्वका कारण सृजित समस्याले लामो समय खालि रहेको स्थानीय तहहरुले संविधानसभाबाट बनेको संविधानले निर्दिष्ट गरेको व्यवस्था अनुरुप २०७४ को निर्वाचनबाट नयाँ नेतृत्व पाएको थियो ।

यस अवधिमा विकास निर्माणका कार्यलाई अघि बढाउने योजनामा कोभिड-१९ ले पुर्‍याएको केही बाधा अड्चनका बाबजुद पनि हामीले साना ठुला गरी ५ हजार बढी योजना सम्पन्न गर्‍यौ भने केही बाँकी र केही चालु अवस्थामा पनि छन । विगतमा पनि नगरवासीले विकास लगायतका हरेक विषयमा पुर्‍याउनुभएको सहयोग र सुझाव अतुलनीय छ ।’

‘टोल टोलको आवश्यकतालाई छलफलका माध्यमबाट पहिचान गरी स्वयं टोल बासीले वडा हुँदै विकास योजना निर्माण गर्ने कार्यलाई निरन्तरता दिइनेछ’, अपिलमा भनिएको छ, ‘जनताको समस्याको समाधान बोलेर होइन बुझेर र गरेर देखाउन सक्नुपर्छ भन्ने भावनाबाट हामी अगाडि बढेका छौ ।’
जारी अपिलमा भनिएको छ, ‘विकास निरन्तरको अभ्यास हो यसको कुनै अन्त्य हुँदैन, जनताका आवश्यकताले नै विकासको खाका कोर्दछ । एउटा विकासको कार्यले अर्को विकासलाई निम्त्याइरहेको हुन्छ । नगरपालिकाको समावेशी विकासको अभियानमा हिजोपनि व्यास नगरवासीको साथ र सहयोग रहृयो भने अबपनि त्यो साथ र सहयोग रहनेमा हामी पूर्ण आशावादि छौ । ५ वर्षको अवधिमा व्यास नगरपालिकाबाट सम्पादित काम हामीले पटक पटक सार्वजनिक गरेका छौं ।’

‘हामीसंग स्पष्ट दृष्टिकोण छ, मार्गचित्र छ, जनताको भावना बुझेर काम गर्ने अनुभव र साहस छ, हामीले विकासका प्राथमिकता बुझेका छौ’, अपिलमा भनिएको छ, ‘२०७९ वैशाख ३० गते हुने व्यास नगरपालिकाको निर्वाचनमा अनुभव, ज्ञान र सिपले पूर्ण नेपाली कांग्रेसका तर्फबाट नगर प्रमुख, उप-प्रमुख, १४ वटै वडाका वडाध्यक्ष, वडा सदस्यका उम्मेद्वारहरुलाई यहाँहरुबाट सदाजस्तै स्नेह, सद्भाव र सहयोग प्राप्त हुने अपेक्षा गर्दछौं ।’

सेयर गर्नुहोस्

प्रतिक्रिया दिनुहोस्

सम्बन्धित खवर