शुक्लागण्डकी-६ स्थित खैरेनी माविमा अक्षयकोष स्थापना
भञ्ज्याङ समाचारदाता/खैरेनीटार
तनहुँको शुक्लागण्डकी नगरपालिका-६ खैरेनीटार स्थित खैरेनी माध्यमिक विद्यालयमा अक्षयकोष स्थापना गरिएको छ । स्थानीय खिमबहादुर राना र विष्णुमाया राना दम्पतीले दिवंगत छोरी उषा राना (शोभा)को स्मृतिमा दुइ लाख २२ हजार २२२ रुपैयाँको अक्षयकोष स्थापना हुन् ।
राना दम्पतीले वडाध्यक्ष एवं विद्यालय व्यवस्थापन समितका अध्यक्ष वुद्धिबहादुर थापालाई बुधबार अक्षयकोष स्थापनार्थ नगद हस्तानतरण गरेका छन् । अक्षयकोषबाट प्राप्त रकमले विपन्न विद्यार्थीलाई छात्रावृत्ति दिईने रानाले बताए ।
‘अक्षयकोषमा जम्मा गरेको रकमबाट आएको ब्याजले जेहेन्दार, पढाइमा अब्बल भएका गरिब विधार्थीलाई छात्रावृत्ति दिने हो । गरिब भएर पढाइ छोड्न नपरोस’, उनले भने ‘गरिब परिवार भएपनि पढाइमा अब्बल भएका विधार्थीले पढ्न पाउनुपर्ने आफ्नो मान्यता रहेको छ ।’
वडाध्यक्ष एवं विद्यालय व्यवस्थापन समितिका अध्यक्ष थापाले गरिब विद्यार्थीका लागि अक्षयकोषमार्फत छात्रावृत्ति वितरण गर्दै पढाइलाई निरन्तरता दिन सघाइरहेको बताए । उनका अनुसार करिब ३५ विद्यार्थीलाई अक्षयकोषबाट प्राप्त व्याजले छात्रावृत्ति वितरण गर्दै आइएको छ ।
अक्षयकोष दाता राना २०४० सालमा खैरेनीटार गाविसको प्रधानपञ्च थिए । विभिन्न सामाजिक क्षेत्रमा क्रियाशिल उनी अरनिको आवसीय बोर्डिङ स्कुल खैरेनीटारका संस्थापक समेत हुन् ।
