तनहुँका इस्लाम धर्मावलम्बीहरु बकर इद धुमधामले मनाउँदै
भञ्ज्याङ न्यूज
तनहुँका इस्लाम धर्मावलम्बीहरूले आज बकर इद धुमधामका साथ मनाइरहेका छन् । जिल्लाको विभिनन पालिकामा बसोवास गरेका इस्लाम धर्मावलम्बीहरु बिहानैदेखि नुरी हन्फी जामे मस्जिद, मस्जिदमा भेला भएर विशेष नमाज पढ्दै शुभकामना आदान-प्रदान गर्दै बकर इन पर्व मनाइरहेका छन् ।
इद उल फित्र अर्थात् रमजान पर्वको ७०औं दिनमा बकर इद मनाउने प्रचलन रहेको छ । तीन दिनसम्म मनाइने यो पर्वलाई ‘इद-उल-जुहा’ पनि भनिन्छ । बलिदानीको पर्वका रुपमा लिइने बकर इद मुस्लिम महिना जुल हिज्जाको दशौं दिन मनाउने गरिन्छ ।
हिजरी संवत् अनुसार १४३५ वर्षपहिले अल्लाहको आदेशमा इब्राहिमले आफ्ना छोरा इस्माएल अलेह सलामलाई बलिदान गर्न तयार भएको सम्झनामा यो पर्व मनाउन थालिएको मुस्लिम धार्मिक अगुवाहरू बताउँछन् ।
नमाज पढिसकेपछि घर-घरमा गई बलि दिने र एकापसमा शुभकामना आदान-प्रदान गर्नुका साथै आफ्ना आफन्तजनसँग बसेर मीठो खानेकुरा खाने प्रचलन रहेको दमौली मुस्लिम अन्जुमन कमिटीका सचिव मन्सुर अहमदले बताए ।
इस्लाम धर्मावलम्बीले विभिन्न जनावरको बलि दिने र त्यसलाई तीन भाग लगाई एक भाग परिवारले भोजन गर्ने, एक भाग पाहुनालाई दिने र एक भाग गरिब र दुःखीलाई बाँड्ने मुस्लिम धार्मिक प्रचलन रहेको छ ।
