एसइइको नतिजा खस्कियो : तनहुँका कुनै पनि विद्यार्थीले ल्याएनन् ४ जीपिए

राष्ट्रिय परीक्षा बोर्डले बुधबार सार्वजनिक गरेको माध्यमिक शिक्षा परीक्षा -एसइइ) नतिजा अनुसार जिल्लाको नतिजा खस्किएको छ। तनहुँका कुनैपनि सामुदायिक तथा संस्थागत विद्यालयका विद्यार्थीले परीक्षामा ४ जीपिए प्राप्त गर्न सकेका छैनन ।

जिल्ला शिक्षा विकास तथा समन्वय इकाईका अनुसार जिल्लामा २ जना विद्यार्थीले मात्र ३.९५ जीपिए प्राप्त गरेका छन् । व्यास नगरपालिकास्थित परासर आवसीय माध्यमिक विद्यालयकी छात्रा र शुक्लागण्डकी नगरपालिका स्थित ब्राइट फ्युचर विद्यालयका छात्र गरी २ जनाले ३.९५ जीपिए ल्याएका छन् । उनीहरु संस्थागत विद्यालयका विद्यार्थी हुन् । यस्तै, सामुदायिक विद्यालयतर्फसबैभन्दा बढि जीपिए ल्याउने साधारणतर्फखैरेनीटार माविकी छात्राले ३.८५ र प्राविधिक धारतर्फसत्यवती माविका छात्रले ३.८८ जीपिए प्राप्त गरेका छन्।

४ नगरपालिका र ६ गाउँपालिकाका गरी ६ हजार १५२ जना विद्यार्थी परीक्षामा सहभागी भएका थिए । एसइइ परीक्षाको समयमा १४९ जना अनुपस्थित र ५४ जनाको प्राविधिक रुपमा व्यवस्थापन मिल्न बाँकी रहेर नतिजा प्रकाशन नभएको इकाइका प्रमुख बसन्तराज पौडेलले बताए । उनले भने, ‘नतिजा प्रकाशन भएकामध्ये ४५८ जनाको जीपिए १.६ तल आएको छ ।’

जिल्लाका विद्यालयको २०७७ सालभन्दा २०७८ सालको एसइइको नतिजा खस्किएको देखिन्छ । अघिल्लो वर्ष सामुदायिकमा ६७ र संस्थागतमा ६३ गरी १३० जना विद्यालर्थीले ४ जीपिए ल्याएका थिए । यसवर्ष भने सबैभन्दा बढि जीपिए भनेकै ३.९५ हो । अघिल्लो वर्षमा ३.७५ देखि ४ जीपिए ल्याउने ८५४ जना थिए भने अहिले ४२ जनामात्र छन् ।

त्यस्तै, अघिल्लो वर्ष ३.२५ देखि ३.७५ ल्याउने एक हजार ३७१ जना थिए भने यो वर्ष २८१ जना रहेका छन् । यसैगरी २.८५ देखि ३.२५ जीपिए ल्याउने पहिले २ हजार ३६ जना थिए भने अहिले ६१४ जना मात्र रहेको कार्यालयले जनाएको छ ।

यस्तै, शुक्लागण्डकी स्थित पञ्चमुनी माविका ४ जना विद्यार्थीले २०७७ सालको एसइइ परीक्षामा ४ जीपिए ल्याएका थिए । अहिले ३.८ जीपिए रहेको विद्यालय प्लसटुका संयोजक लक्ष्मण पुरीले बताए । उनले भने, ‘कोरोना कहरका कारण शैक्षिक गतिविधि राम्रोसंग सञ्चालन हुन नसक्दा अहिले एसइइको नतिजा खस्किएको छ ।’

यस विद्यालयका २१६ जना विद्यार्थी परीक्षामा सहभागि भएका थिए । जसमध्ये ३.६ देखि ३.८ जीपिए १२ जना विद्यार्थीले ल्याएका छन् । उनले भने, ‘आन्तरिक परीक्षामा उत्कृष्ट रहेका विद्यार्थीको नपत्याउने तरिकाले नम्बर आएको छ । धेरै विद्यार्थीहरु रि-टोटलिङ गर्ने भनिरहेका छन् ।’

नेपालकै उत्कृष्ट सामुदायिक विद्यालयमध्ये एक गनिने सत्यवती माविका विद्यार्थीहरुको नतिजा पनि राम्रो आएको छैन । अघिल्लो वर्षधेरै विद्यार्थीले ४ जीपिए ल्याउन सफल भएपनि यो वर्षने ३.८८ जीपिए नै उत्कृष्ट जीपिए रहेको प्रधानध्यापक एकबहादुर गुरुङले बताए । उनले भने, ‘अघिल्लो वर्षआन्तिरिक मुल्यांकनका आधारमा नम्बर पठाइएको थियो । यो वर्षभने बोर्डले नै पुरानो हिसावमा परीक्षा लियो । छोटो समयको पढाइ पश्चातको परीक्षाले सबैको नतिजा खस्काएको छ ।’

यस्तै, कोरोनाका कारण अधिकांश परीक्षाको नतिजा परीक्षा नदिइकन निकाल्ने पछिल्लो प्रचलनले विद्यार्थीले नपढेपनि पास हुने रहिछ भन्ने सोच पाल्दा एसइइको नतिजा खस्किन पुगेको व्यास नगरपालिका-१ जलदेवि माविका प्रधानध्यापक जयराम सेढाइ बताउँछन् ।

‘कोरोनाका कारण दुइ वर्ष राम्रोसंग पढाइ पनि भएन, नपढि र परीक्षा पनि राम्रोसंग नलिई विद्यार्थीलाई कक्षा चढाइयो, नपढि पनि पास हुने रहिछ भन्ने सोच पालिसकेका विद्यार्थीलाई ६ महिनाको पर्ढाईपछि एसइइमा सहभागि गरायौं’, उनले भने, ‘सिकाई नपुगि कक्षा चढाउने र पढनुपर्छ भन्ने सोच नै हराइसकेका विद्यार्थीलाई छोटो सिकाई पश्चात परीक्षामा सहभागि गराउँदा नतिजा खस्कन पुगेको हो ।’

सेयर गर्नुहोस्

प्रतिक्रिया दिनुहोस्

सम्बन्धित खवर