चार बुँदे सहमतिपछि रत्नहरि अस्पतालको ताला खुल्यो
भञ्ज्याङ न्यूज
डेंगु संक्रमण भई अस्पताल भर्ना भएका व्यास नगरपालिका-१० निवासी ३५ वर्षीय कमलप्रसाद शर्माको मृत्यु अस्पतालको लापरवाहीका कारण भएको भन्दै पीडित पक्षले लगाएको ताला खोलिएको छ ।
पीडित पक्षले आइतबार अस्पतालमा तालाबन्दी गरेका थिए । तनहुँको व्यास-४ मुख्यचोकस्थित रत्नहरि अस्पतालमा लगाइएको ताला चार बुँदे सहमति गरी खोलिएको हो ।
सहायक प्रमुख जिल्ला अधिकारी काशीराम गैह्रेको संयोजनमा सोमबार बसेको पीडित र अस्पताल सञ्चालकबीचको बैठकले ताला खोल्ने सहमति गरेका थिए ।
गम्भीर प्रकृतिको बिरामीलाई थप उपचारका लागि सुविधासम्पन्न अस्पतालमा रिफर नगरी अस्पतालमै विभिन्न बहानामा राखिएको पीडित परिवारको आरोप लगाएका छन् ।
अस्पतालमा शर्माको मृत्यु भएको घटनामा उपचारको क्रममा भएको कमी कमजोरी पत्ता लगाई दोषीलाई कारवाही सिफारिस गर्न मेडिकल काउन्सिललाई अनुरोध गर्ने बैठकले निर्णय गरेको छ ।
व्यास नगरपालिकाभित्र रहेका सबै अस्पतालहरु नेपाल सरकारले तय गरेका मापदण्ड अनुसार चलेका छन् की छैनन् भन्ने विषयमा स्थानीय तह र जिल्ला प्रशासन कार्यालयले सहकार्य गरी असार १९ गतेदेखि नै अनुगमन गर्ने र असार २१ भित्र यथार्थ विवरण सार्वजनिक गर्ने सहमति गरिएको छ ।
असार १६ गते रत्नहरि अस्पतालमा कमल शर्माको उपचार र पोखरा पठाइएकामा एवं मृत्यु भएको सन्दर्भमा सत्यतथ्य के भएको हो ? तत्काल सार्वजनिक गर्न उक्त अस्पताललाई निर्देशन दिने सहमति भएको छ।
यस्तै, व्यास नगरपालिकाले नगरभित्र सञ्चालित अस्पतालको अनुगमन गर्ने भएको छ । व्यास नगरपालिकामा कार्यरत इन्जिनियर शर्माको रत्नहरी अस्पतालको लापरवाहीका कारण मृत्यु भएपछि नगरपालिकाले नगर क्षेत्रभित्रका अस्पतालले दिने सेवा र प्रयोगशालाको अनुगमन गर्ने भएको हो ।
नगरपालिकाले अस्पतालको सेवाका बारेमा पटक-पटक गुनासो आएकाले नवीकरण, दर्ता नगरी स्वास्थ्य संस्था सञ्चालन गरिएको सम्बन्धमा पाँच दिनभित्र प्रभावकारी अनुगमन गर्ने र आवश्यक सुधारका लागि सम्बन्धित अस्पताललाई निर्देशन दिने निर्णय गरेको प्रमुख प्रशासकीय अधिकृत गंगालाल सुवेदीले बताएका छन् । निर्देशन पालना नगरेमा कानून बमोजिम कारवाही गरिने उनले बताए ।
