पार्टीबाट अलग र स्वतन्त्र रहेकालाई फर्किन कांग्रेस तनहुँको आव्हान

नेपाली कांग्रेस तनहुँले विभिन्न कारणले पार्टीबाट अलग भएका, स्वतन्त्र भूमिका रहेकालाई मूलघरमा फर्किन आग्रह गरेको छ । कांग्रेस तनहुँले आइतबार एक विज्ञप्ती जारी गरी स्थानीय तहको निर्वाचनपछि पार्टीबाट अलग्गिएका, स्वतन्त्र भूमिकामा रहेका कार्यकर्तालाई बिना शर्त नेपाली कांग्रेसको मूलधारमा फर्किन आव्हान गरेको हो ।

अलग्गिएका कार्यकर्ताको सम्मान र मूल्याङ्कनमा आगामी दिनम कुनै विभेद नहुने विज्ञप्तिमा भनिएको छ । कांग्रेस तनहुँका सभापति जितप्रकाश आलेले जारी गरेको विज्ञप्तिमा कांग्रेस तनहुँको भदौ ९ गते सम्पन्न पूर्ण बैठकले धेरै लामो समय लगाई नेतृत्व तहमा रहेका साथीहरु समेत पार्टीको मूलधारमा भन्दा बाहिर रहनहुन्न भन्ने मान्यता रहेको उल्लेख गरिएको छ ।

गत वैशाखमा भएको स्थानीय तह निर्वाचनमा पार्टीका जिम्मेवार निकायबाट न्यायपूर्ण निर्णय गर्न प्रयत्न गर्दागर्दै केही साथीहरु पार्टीबाट राजिनामा दिई वा पार्टीका उम्मेदवार विरुद्ध संगठित अभियानमा लागी विचलित भएको विज्ञप्तिमा भनिएको छ ।

विज्ञप्तिमा भनिएको छ, ‘पार्टीबाट प्राप्त अवसरहरु लिएका र अवसर प्राप्तिका नजिक रहेका साथीहरु पार्टीको उम्मेदवार विरुद्धको तत्कालको आक्रोशमा लाग्नुभएको कारण पार्टीलाई क्षति पुगेको छ ।’

नेपाली कांग्रेसको वैचारिक धरातल र नेपाली राजनीतिको विभिन्न चरणमा भएका आन्दोलनहरुमा निर्णायक भूमिका निर्वाह गरेको ऐतिहासिक पृष्ठभूमिबाट नेपाली कांग्रेसको सदस्य हुनुमा गौरव गर्ने र शिर उचा राख्ने अवस्था रहेको विज्ञप्तिमा उल्लेख गरिएको छ ।

विज्ञप्तिमा इतिहासको कालखण्डमा भएका व्यक्तिगत त्रुटिहरुले नेपाली कांग्रेस पार्टीको सिद्धान्त, आदर्श र मान्यता कमजोर नभई व्यक्तिहरु नै किनारामा परेको इतिहास साक्षी छ, कांग्रेसको इतिहासमा तनहुँले महत्वपूर्ण भूमिका र नेतृत्व गर्दै आएको पनि स्मरण गराउँछौ भनिएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर